O mozo que disparou contra Trump tiña material explosivo no coche e na casa
O mozo que disparou contra Trump tiña material explosivo no coche e na casa
O agresor, abatido por axentes do Servizo Secreto, matou un asistente ao acto e feriu dúas persoas de gravidade
O expresidente recibiu un impacto de bala na orella dereita que lle resgou a parte superior
Joe Biden condenou o ataque nunha declaración televisada e falou por teléfono co seu rival
As forzas de seguridade atoparon dispositivos con material explosivo no vehículo do presunto francotirador, aparcado preto do lugar onde Trump daba o mitin, e tamén na súa vivenda, en Bethel Park, no mesmo estado de Pensilvania.
Un veciño di que non o coñecía, que non recorda nin velo, aínda que dá por feito que tivo que pasar pola rúa. Outro explica que é impactante espertar pola mañá e atopar o barrio tomado e saber polas novas o porque.
A Thomas Matthew Crooks tardaron unhas horas en identificalo porque non portaba ningún documento cando foi abatido. Agora sábese que o fusil semiautomático que empregou no atentado foi adquirido de forma legal polo seu pai.
Investigan os motivos
Porén, continúan investigando as súas motivacións e se tivo ou non cómplices. O fiscal do distrito de Butler, onde se produciu o atentado, di que de momento nada o indica pero que hai que confirmalo.
O mozo, de 20 anos e sen antecedentes, disparou contra Trump desde un tellado, a 140 metros do escenario en que estaba o expresidente, ao que feriu levemente nunha orella.
![Imaxe de Thomas Matthew Crooks. REUTERS](https://img-g24-crtvg.flumotion.com/prog24/2024/20240714/TRUMPEINVESTIGACIONATENTADO_frame_2080.png)
"Non teremos medo"
Tras recibir atención nun hospital local, o magnate de 78 anos voou de volta a Nova Jersey. Segundo explicou na súa propia rede, Truth Social, a bala resgoulle a parte superior da orella dereita. O seu equipo confirmou que se atopa ben.
"Grazas a todos polos pensamentos e oracións onte. Coma se tivese sido Deus só o que evitou o impensable de que pasase. Non teremos medo, senón que nos manteremos fortes na nosa fe e desafiantes fronte ao mal", asegurou.
Tamén recordou os tres asistentes ao mitin alcanzados polas balas. Un deles, un bombeiro de 50 anos, morreu e os outros dous quedaron feridos graves.
Medidas de seguridade
O servizo secreto desmentiu os rumores de que o equipo de Trump lle pedira seguridade adicional para este encontro con seguidores e que lla denegaran. De feito, asegura que ampliaron os recursos desde que subiu o ritmo de campaña.
![Persoal de seguridade atende a Trump. REUTERS/Brendan McDermid](https://img-g24-crtvg.flumotion.com/prog24/2024/20240714/Trumpferido.jpg)
Condena de Biden
O presidente de Estados Unidos, Joe Biden, telefonou o seu rival pouco despois do acontecido. Tamén falou co gobernador de Pensilvania, Josh Shapiro, e co alcalde de Butler, Bob Dandoy.
O mandatario regresou a Washington antes do previsto desde Delaware e condenou a agresión nunha declaración televisada.
"Non hai lugar nos Estados Unidos para este tipo de violencia, é enfermizo, enfermizo; é unha das razóns polas que temos que unir este país. Non podemos permitir que isto estea pasando, non podemos ser así, non podemos tolerar isto", afirmou.
Ademais, dixo que todo o mundo debe condenar a violencia.
"O mitin de Trump tiña que facerse pacificamente, sen problemas. A idea de que haxa violencia política nos Estados Unidos é simplemente incrible. Todo o mundo, debe condenalo. Todos", reiterou.
Intento de magnicidio
A Casa Branca indicou que o presidente está a recibir informes actualizados das autoridades de Seguridade Nacional e policiais encargadas da investigación, tratada como un intento de magnicidio.
O mitin celebrouse días antes da Convención Nacional Republicana prevista, desde este luns e ata o xoves en Milwaukee (Wisconsin), na que se confirmará o nomeamento de Trump como candidato republicano.
Efectos na campaña
A maior parte de analistas electorais norteamericanos coinciden ao sinalar que o atentado converte a Donald Trump nun mártir, nun heroe, que vai arrasar na convención republicana que comeza este luns en Wisconsin.
O xefe de campaña de Trump asegurou este domingo que os comentarios "noxentos" dos activistas de esquerdas, dos doantes demócratas e do propio Biden son os culpables do atentado.
E mentres, Joe Biden segue mantendo que é o único candidato demócrata que lle pode gañar a Trump, aínda que cada día que pasa sexan máis os demócratas que o dubidan.
![Membros dos Servizos Secretos na Casa Branca. REUTERS/Nathan Howard](https://img-g24-crtvg.flumotion.com/prog24/2024/20240714/CasaBranca.jpg)
Reaccións internacionais
As redes sociais enchéronse de mensaxes de condena e apoio o expresidente chegados de líderes mundiais e de outros persoeiros.
O presidente do Goberno, Pedro Sánchez, tamén se pronunciou a través da plataforma X. Segundo subliña, "a violencia e o odio non teñen cabida nunha democracia".
Quiero trasladar mi más rotunda condena al ataque sufrido por Donald Trump durante un mitin en Pensilvania.
— Pedro Sánchez (@sanchezcastejon) July 14, 2024
La violencia y el odio no tienen cabida en una democracia.
Mis mejores deseos para una pronta recuperación al expresidente Trump y al resto de heridos y mi más sincero…
Na mesma rede, o presidente do PP, Alberto Núñez Feijóo, reivindicou a "moderación" e lamentou que "haxa quen prefira disparar a votar para defender a súa ideoloxía".
Alimentar el odio hacia quien piensa diferente desemboca en situaciones como la vivida hace unas horas en EEUU.
— Alberto Núñez Feijóo (@NunezFeijoo) July 14, 2024
Reivindico la moderación, lamento que haya quien prefiera disparar a votar para defender su ideología, y por supuesto deseo una pronta recuperación a Donald Trump.