Fin das chamadas comerciais sen consentimento: adeus ao spam telefónico

Este xoves entran en vigor os cambios na lei de telecomunicacións. Así que, quedan prohibidas as chamadas comerciais ou de publicidade sen consentimento.

As empresas que incumpran poderían enfrontarse a unha multa de ata 100.000 euros, por sanción leve.

A nova norma vai garantir que só os que queiran van recibir as chamadas comerciais. Pon fin a prácticas abusivas, sobre todo de sectores moi concretos. Aínda que a OCU teme que poidan facer trampas para esquivar a lei.

"Polo que habería que inspeccionar e vixiar escrupulosamente a telefonía, a enerxía e os servizos financeiros, que acumulan a práctica totalidade do spam telefónico", informa Enrique García, voceiro da asociación de consumidores.

A Axencia Española de Protección de Datos será a encargada de velar polo cumprimento da norma e é onde debemos denunciar se as empresas non cumpren. Pódese retirar o consentimento expreso por escrito ou por teléfono no momento da chamada, aínda que só se pode identificar quen está detrás nun 33 % dos casos.

"No resto son chamadas anónimas onde o consumidor non ten xeito de exercer un dereito cidadán fundamental", continúa o voceiro da OCU.

"Durante un tempo seguro que nos deixarán tranquilos, máis adiante seguro que atopan algún subterfuxio e o xeito de volver a darnos a lata", teme unha consumidora.