Fin de semana sen tren na Coruña e con servizo de autobús ata Santiago
Fin de semana sen tren na Coruña e con servizo de autobús ata Santiago
Renfe programou máis de 250 viaxes por estrada para garantir o servizo dos viaxeiros da Coruña, Ferrol e Betanzos
Os viaxeiros sabían da modificación do transporte cando sacaron o billete que xa garantía a conexión cara aos destinos finais
Os pasaxeiros que esta fin de semana tiñan previsto empregar o tren para ir ou volver á Coruña, Betanzos ou Ferrol están facendo o percorrido ata Santiago en autobuses por mor das obras na estación de San Cristovo.
Cos mesmos horarios, os mesmos billetes e nas dúas direccións, os viaxeiros poden enlazar na estación compostelá cos trens de destino que tiñan previsto.
O percorrido por estrada dos viaxeiros que chegan da Coruña ata Santiago durou hoxe algo máis do habitual polas vías pero desde que sacaron o billete estaban informados das obras na estación e dos novos horarios desta fin de semana con tal motivo.
"Vou cara a Vigo. Fixemos o percorrido no autobús pero está todo ben controlado, a condutora do autobús tamén moi atenta", di unha viaxeira.
"É algo incómodo porque durou o dobre de tempo pero son dous días. Son peores os atrasos habituais de Renfe, pero este servizo é cómodo", asegura outra.
Os viaxeiros que chegan a Santiago e teñen como destino a Coruña, Ferrol ou Betanzos son conducidos pola plataforma para coller os autobuses con destino á Coruña e destino a Ferrol que sairán á hora que marca o billete.
"Veño de Vigo cara a Ferrol. Comprei o billete o xoves e xa advertía de que este traxecto se facía en autobús. Polo que nos dixo a operaria de Renfe en tempo imos chegar antes no bus ca se foramos no tren, entón fenomenal", detalla outro viaxeiro
Ata a reapertura da estación pechada polas obras para modernizar os sistemas de sinalización e comunicación, os autobuses cubrirán máis de 250 viaxes, incluídas as de primeira hora do luns. Prevese que despois a circulación ferroviaria volva xa á normalidade.
