Millán Mon avoga por unha reforma lexislativa que prohiba os escanos rotatorios en Europa

O europarlamentario electo do PP, o galego Francisco Millán Mon, propón unha reforma lexislativa para acabar cos escanos rotatorios como o que compartirá o BNG con ERC neste nova lexislatura do Parlamento europeo. 

Nunha entrevista no Galicia por diante, o popular acusa os nacionalistas galegos de "ocultar a verdade" e de cometer "fraude". Afirma que "non explicaron que o escano de Ana Miranda ía ser a tempo parcial e non explicaron o pacto de repartición dos tempos antes dos comicios. Non houbo transparencia por parte do BNG nestas cuestións. A lexislación debería cambiar e acabar así con este tipo de prácticas". 

Millán Mon confía en que nesta lexislatura se materialice o compromiso do PP de contar cun comisario de pesca específico, independente de agricultura. Así lembrou que "foi unha idea do PP español que fixo súa o PP europeo. Ursula Von der Leyen anunciouno no Pino. Gustaríame que se cumpra e deste xeito non se produza esa hipertrofia, esa esaxeración dunha deriva medioambientalista radical e que pospón os intereses e as dimensións económicas e sociais da pesca". 

O europarlamentario electo destacou os bos resultados do PP español e galego nos comicios do 9 de xuño e conclúe que "o electorado sabe quen traballa por el en Europa".

Lembrou que son a segunda delegación máis numerosa dos populares europeos algo que, segundo dixo, terá reflexo nas institucións. Afirmou que "contar cunha maior presenza é unha garantía de que os temas que nos preocupan como españois e galegos teñen atención prioritaria por parte do todo o grupo parlamentario popular europeo". 

Porán o foco no sector primario e a industria

Así destacou que nesta lexislatura poñerán o foco no sector primario e na industria. Entende que é necesario "un gran pacto pola industria e a creación de emprego de calidade". Por outra banda, destaca o "compromiso claro do PP co estado de dereito e a igualdade entre todos", polo que, di, será unha prioridade nesta lexislatura. 

Cuestionado sobre as negociacións para elixir os novos altos cargos da Unión Europea, Millán Mon defende a proposta do Partido Popular Europeo de que os cinco anos de mandato do Consello Europeo se repartan á metade entre eles e os socialdemócratas. Entende que é "o lóxico" despois de obter 190 deputados e dada a relevancia do consello europeo.