Fronte común de Rueda e Barbón para esixir avances no Corredor Atlántico Noroeste

Os presidentes de Asturias e de Galicia, Adrián Barbón e Alfonso Rueda, respectivamente, reivindicaron este luns a "fronte común" posta en marcha por ambos os territorios para esixir avances no desenvolvemento do Corredor Atlántico Noroeste. Os dous xefes dos executivos rexionais participaron na quinta edición dos Encontros do Eo, en que expresaron a cooperación que manteñen ambas as comunidades á marxe das siglas políticas de cada mandatario.

Rueda lamentou que, desde o nomeamento do comisionado do Corredor Atlántico, José Antonio Sebastián, en xaneiro deste ano, o seu goberno aínda non foi "capaz" de manter un encontro con el. "Non será por non tentalo", dixo o presidente galego, quen advertiu de que non lle gustaron "demasiado" os plans de investimentos anunciados, que están "moi por baixo" das cifras que se necesitan e que teñen "poucas concrecións". O obxectivo do impulso do Corredor Atlántico, a xuízo de Rueda, é poder "ir recuperando o terreo perdido" con respecto ao Mediterráneo. 

Barbón tamén manifestou a importancia do ramal noroeste do Corredor Atlántico, pero dixo que non serviría "de nada se non se garante a conexión con Francia". Neste punto, referiuse á necesidade de impulsar unha macrorrexión atlántica, que "mellorará a capacidade de influencia" para conseguir fondos económicos e "visibilizar os obxectivos comúns". 

Novo modelo de financiamento autonómico

Os presidentes coincidiron este luns en expresar a "urxencia" dun novo financiamento autonómico que conte con máis recursos e que non debe pasar por acordos bilaterais. Barbón, do PSOE, e Rueda, do PP, defenderon un sistema que prime o custo da prestación dos servizos públicos e teña en conta criterios como a dispersión e o envellecemento da poboación.

Para o xefe do Executivo galego, é "cada vez máis urxente" que se afronte un debate que é "incómodo" e "nunca deixará a satisfeito a todo o mundo". Neste sentido, rexeitou "calquera negociación bilateral", debido a que sería "mortal de necesidade" para os intereses de rexións como Galicia e Asturias. Así, recalcou a importancia de que as dúas comunidades se manteñan "unidas" nas súas reivindicacións ante o Goberno central.

Barbón vaticinou que "haberá diálogos bilaterais", pero remarcou que "o que non pode haber son acordos bilaterais" nunha hipotética reforma do modelo de financiamento que "necesita máis recursos". "Non haberá reforma se non se parte da premisa de que o Goberno ten que poñer máis diñeiro", recalcou o presidente asturiano, antes de insistir en que as demandas das dúas comunidades "van gañando forza" ao sumarse máis rexións ás súas formulacións.