Galicia estrea o plan para combater a calor extrema
Galicia estrea o plan para combater a calor extrema
A norma de maior calado prohibe os traballos ao aire libre baixo alerta laranxa ou vermella da AEMET
O límite de risco para activar as alertas oscila entre os 37 e os 42 graos
Para facerlles fronte aos efectos do cambio climático entra en vigor o plan do Goberno central para combater as vagas de calor e as situacións de clima extremo.
Dende este sábado estará prohibido realizar algúns traballos ao aire libre cando haxa avisos por temperaturas altas, concretamente cando a alerta sexa laranxa ou vermella.
O límite de risco para activar as alertas aquí en Galicia oscila entre os 37 e os 42 graos. As empresas estarán obrigadas a adaptar a xornada laboral do persoal que traballe no exterior nas horas centrais do día. Afectará tamén a aqueles lugares que non poden quedar pechados.
Así, a alerta laranxa actívase cando a temperatura máxima alcanza os 37 graos nas provincias da Coruña e Pontevedra e en toda a provincia de Lugo salvo no sur, onde o límite é de 39 graos, igual que en toda a provincia ourensá.
Ademais, a Axencia Estatal de Meteoroloxía considera como alerta vermella cando o termómetro chega aos 40 graos en toda a comunidade galega, salvo no sur de Lugo e a provincia de Ourense, onde se decreta con 42.
