Goberno e sindicatos pactan a reforma do subsidio de desemprego sen o apoio da patronal

O Ministerio de Traballo e os sindicatos lograron pechar un acordo para reformar o sistema de protección asistencial por desemprego, ao que non se sumou a patronal, que incluirá a posibilidade de compatibilizar un emprego co cobramento tanto do subsidio como da prestación contributiva.

A vicepresidenta segunda do Goberno e ministra de Traballo e Economía Social, Yolanda Díaz, defendeu o acordo do que asegurou: "Isto non é ningunha paguiña, é un dereito".

Díaz asinou o pacto cos secretarios xerais de CCOO, Unai Sordo, e de UGT, Pepe Álvarez, tras o visto e prace dos órganos de dirección sindical, unha reforma comprometida con Bruxelas e necesaria para o seguinte desembolso dos fondos europeos.

Á sinatura do acordo non asistiron as patronais CEOE e Cepyme. Fontes da patronal indicaron a que a reforma do subsidio fora máis un proceso de consultas por parte do Goberno que unha negociación. A CEOE aludiu ao escaso diálogo existente na elaboración da reforma.

Yolanda Díaz: "Isto non é ningunha paguiña"

Yolanda Díaz agradeceu aos sindicatos a consecución deste acordo que chega o día no que se cumpren 104 anos da creación do Ministerio de Traballo.

Segundo Díaz, o acordo demostra que o diálogo social está "a pleno rendemento". A vicepresidenta segunda do Goberno que indica que estamos ante unha norma "profundamente feminista", pensada para acabar cos "nesgos de xénero" e que busca protexer os que máis o necesitan.

Díaz aseguraba tras a sinatura que "mellora a vida dos que peor o pasan" e permite cumprir con Europa "en tempo e forma", e aclaraba: "Isto non é ningunha paguiña", lembrando que o 80 por cento das persoas perceptoras do subsidio non esgotan o tempo da prestación.

Pepe Álvarez, UXT: "É un acordo para que as persoas que están en desemprego poidan ter acceso a un emprego"

O secretario xeral da UXT, Pepe Álvarez, asegura que estamos ante un acordo "importantísimo" que "pon a España a cero en relación coa brecha de xénero". Segundo Álvarez, non só beneficia aos traballadores, senón tamén ás empresas e "permitirá ás persoas que estean en situación de desemprego acceder a un posto de traballo".

Álvarez celebrou que se manteña a sobrecotización para maiores de 52 anos, que foi un punto de fricción na anterior proposta e que agora se recupera para tratar de lograr o apoio de Podemos, que foi decisivo para facer decaer a reforma o pasado xaneiro.

Unai Sordo, CCOO: "Mellora as condicións de acceso ao subsidio de moitas persoas no noso país"

O secretario xeral de Comisións Obreiras, Unai Sordo, felicitábase por este acordo "necesario e moi relevante" que mellora as condicións do decreto que non foi convalidado polo Congreso e que chega despois dunha negociación "longa e difícil" co Goberno. 

A xuízo se Sordo, a reforma "mellora as condicións de acceso ao subsidio de moitas persoas no noso país", e que se enmarca na lóxica de alcanzar o pleno emprego.

O secretario xeral de CCOO facía ademais un chamamento ás forzas políticas para que ratifiquen a reforma. 

A patronal cuestiona que "non se produciu unha verdadeira negociación"

As patronais CEOE e Cepyme reprocharon este mércores ao Ministerio de Traballo a "falta dunha verdadeira negociación" sobre a reforma e vincularon a présa na firma do acordo ás eleccións de Cataluña.

Nun comunicado, a patronal explica que transmitiran á titular de Traballo que non participarían nun acto público destas características. "A nosa postura vén dada porque non se produciu unha verdadeira negociación no marco do diálogo social, senón simplemente un proceso de consulta", alegan.

A CEOE sinala que non recibiran unha nova proposta por parte do ministerio ata este pasado luns e que esa proposta carecía de memoria económica. Para a patronal, é algo de "especial gravidade" nun momento en que os Orzamentos Xerais do Estado están prorrogados e dado o impacto económico das medidas recollidas no documento.

"En todo caso puidera parecer que a présa do proceso para a sinatura deste mércores (día e medio) responde máis a unha estratexia política ante as eleccións do próximo domingo que á vontade de alcanzar un acordo real", engaden.

A patronal reitera no seu comunicado a "aposta" polo diálogo social, así como a vontade de concertación para seguir avanzando en obxectivos comúns, "que son a prosperidade económica, a creación de emprego e o logro das maiores cotas de benestar social para todos". 

Os detalles da reforma

A reforma do subsidio por desemprego que finalmente saíu da mesa de diálogo social incorpora algunhas novidades respecto á que tombou en xaneiro o Congreso, tras o voto en contra de Podemos.

En concreto, esta reforma permitirá compatibilizar o subsidio asistencial cun emprego por un período máximo de 180 días, sen redución da contía, ou compaxinar a prestación contributiva cun salario a partir do ano de percepción do paro.

Simplifícanse os trámites administrativos para acceder ao subsidio, coa eliminación do mes de espera para as persoas que esgotasen a súa prestación contributiva e queiran solicitar o subsidio.

Manterase no 125 % do salario mínimo interprofesional (SMI) a base de cotización para os subsidios de maiores de 52 anos, fronte á rebaixa que introducía a primeira reforma e motivou o rexeitamento de Podemos ao considerar que se recortaban os importes da pensión futura.

Respecto ás contías, durante os 12 primeiros meses de percepción estableceranse en tres tramos: o subsidio será do 95 % do IPREM durante o primeiros seis meses de cobranza (570 euros mensuais co IPREM actual); do 90 % durante o seguintes seis meses (540 euros) e do actual 80 % durante o resto da duración da prestación (480 euros).

Ao subsidio poderán acceder persoas vítimas de violencia de xénero ou sexual, emigrantes retornados, menores de 45 anos sen cargas familiares e traballadores eventuais agrarios de todo o Estado (uns 200.000, segundo cálculos sindicais). Tamén poderán beneficiarse do subsidio os traballadores residentes en Marrocos que desempeñasen a súa última relación laboral nas cidades autónomas de Ceuta e Melilla sen necesidade de acreditaren residencia en España, sempre que reúnan todos os requisitos establecidos na lexislación aplicable.

A reforma elimina os subsidios parciais para quen traballase a tempo parcial, que poderá cobralos íntegros, e á vez permitirá que as persoas con menos de 12 meses cotizados (que son os necesarios para acceder a unha prestación contributiva) poidan acceder ao subsidio, unha medida que beneficiará fundamentalmente aos mozos.

Establécese un réxime de compatibilidade entre os subsidios agrarios de Andalucía e Estremadura cos do Réxime Xeral e, adicionalmente, comprométese unha redución das xornadas reais requiridas para acceder aos primeiros como consecuencia da seca.

A reforma permitirá tamén que aqueles que están a cobrar subsidios poidan esgotar as súas prestacións actuais e, posteriormente, pasar a incorporarse no ingreso mínimo vital (IMV), unha pasarela da que quedarán excluídas as vítimas de violencia de xénero e os emigrantes retornados, que se manterán no subsidio.

Así mesmo, introdúcese como causa de suspensión do subsidio que os traballadores fixos-descontinuos sexan chamados a reiniciar a súa actividade e non se reincorporen ao seu posto de traballo, salvo causa xustificada.

A reforma establecerá tamén un mecanismo de reserva de políticas activas de emprego para maiores de 52 anos para destinar unha parte dos fondos de emprego a estas persoas (este ano serán uns 630 millóns de euros).