Grecia aproba a lei que amplía a seis días a semana laboral e liberaliza os horarios
Grecia aproba a lei que amplía a seis días a semana laboral e liberaliza os horarios
O Goberno argumenta que a lei flexibiliza o horario para reducir o traballo e as horas extraordinarias non declaradas
![](https://img-g24-crtvg.flumotion.com/prog24/2023/20230922/GRECIACONTRAAREFORMALABORAL_frame_1777.jpg)
O Parlamento grego aprobou este venres a nova lei laboral impulsada polo Goberno conservador que permite ás empresas impoñer un sexto día laboral e variar os horarios dos empregados para adaptalos ás necesidades de produción.
A reforma foi apoiada polos 158 deputados, dun total de 300, de que dispón tras as eleccións do pasado xuño a conservadora Nova Democracia, do primeiro ministro Kyriakos Mitsotakis, mentres que todos os partidos da oposición votaron en contra, desde a extrema dereita á esquerda radical.
Durante unha intervención no Parlamento previa á votación, o ministro de Traballo, Adonis Georgiadis, defendeu o seu proxecto de lei e asegurou que "nin elimina a xornada de oito horas nin a semana de cinco días".
O Goberno argumenta que a lei flexibiliza o horario para reducir o traballo e as horas extraordinarias non declaradas e así protexe aos traballadores. A reforma permite aos traballadores ter voluntariamente un segundo emprego, dun máximo de cinco horas diarias, xunto á súa actividade principal de oito horas ao día. Ademais, establece que as empresas de varios sectores poden impoñer un sexto día laboral polo que os traballadores recibirán un 40 % adicional sobre o salario diario.
A pesar de que a reforma establece que isto pode suceder "en condicións excepcionais", tanto os sindicatos como a oposición argumentan que na práctica a lei convertira os seis días laborais por semana en algo común, tendo en conta tamén as "case inexistentes" inspeccións de traballo.
Así mesmo, a reforma introduce contratos para "empregados de garda" que practicamente non terán un horario fixo, senón que traballarán cando o seu empregador o requira, a condición de que sexan notificados polo menos 24 horas antes.