Green Day esperta o ánimo punk de toda unha xeración no Son do Camiño

Green Day espertou na primeira xornada do festival Son do Camiño, en Santiago de Compostela, o ánimo punk de toda unha xeración, que cantou e bailou os grandes éxitos da banda californiana nun concerto de máis de dúas horas en que interpretou por completo os álbums Dookie e American Idiot.

A banda liderada por Billie Joe Armstrong era un dos pratos fortes do primeiro día do festival, que na súa quinta edición volveu optar por traer á capital de Galicia un cartel moi ecléctico, para todas as idades e gustos.

Tras os guitarreos áxiles dos murcianos de Arde Bogotá, banda revelación da cal os asistentes corearon temas como "Los Perros" ou "Antiaéreo", e o son latino do artista de Medellín J Balvin, un dos grandes do reguetón que non defraudou ao público ao entoar "Mi gente" ou "La canción", chegou a quenda de Green Day.

Aínda que parecía que o sol non terminaba de saír, finalmente luciu radiante nun anfiteatro polo que pasaron máis de 42.000 persoas, que vibraron en todas e cada unha das actuacións.

A expectación era maiúscula, xa que as entradas para o primeiro día do festival levaban meses esgotadas, e é que alá por novembro, cando saíron á venda os primeiros 30.000 abonos, desapareceron nunhas horas. Os responsables, Green Day, os únicos anunciados nun cartel que aínda entón estaba por desvelarse.

Foi soar os primeiros acordes de "American Dream", do seu novo álbum Saviors, e o público conectou de forma instantánea. Armstrong, con camisa de raias negra e vermella, pelo louro de punta e guitarra de cores, saíu xunto a Mike Dirnt (baixo e coros) e Tré Cool (batería e coros) e despregou a súa habitual enerxía sobre o escenario.

"Let's go crazy" gritou en varias ocasións. E os asistentes obedeceron, especialmente en temas como "Basket case" ou "When I came around".

A banda, que se orixinou a finais dos anos 80 no famoso club punk californiano 924 Gilman Street, coñecido a secas como Gilman, acadaron un grande éxito na década dos 90 e principios dos 2000.

Os californianos non pasaban por España desde 2019, cando actuaron fronte a 10.000 persoas no marco do MTV European Music Awards en Sevilla, e este ano a súa primeira parada foi Santiago de Compostela, tras a cal recalarán en Madrid o próximo 1 de xuño para subir ao escenario da Caja Mágica no festival Road To Río Babel.

Ambos os dous concertos enmárcanse na xira europea Saviors, coa que presentan o seu novo disco homónimo, o décimo cuarto, lanzado en xaneiro deste ano e para moitos o mellor desde American Idiot.

Quizá en algo teña que ver a produción de Rob Cavallo, que volve colaborar cos californianos e foi o responsable do éxito dos álbums Dookie ou American Idiot, traballos que este ano cumpren 30 e 20 anos respectivamente e son toda unha referencia xeracional.

Por iso mesmo decidiron interpretalos por completo, nun espectáculo de máis de dúas horas, co que non defraudaron.

Un dos momentos máis emotivos foi cando unha fan subiu ao escenario e cantou xunto a Armstrong, un verdadeiro showman que animou todo o tempo o público a cantar, a saltar e a gritar.

Tras "Dookie", a banda interpretou algúns temas novos do seu último álbum, como "Bobby Sox", "Dilemma" e, posteriormente, un gran globo inchable creceu coa mítica man suxeitando unha granada con forma de corazón, que deu paso ao álbum American Idiot.

Foi entón cando o público toleou, mentres as baquetas de Tré Cool voaban polo aire.

O rock contundente de "Holiday" ou o tema "BLVD", que todo o mundo cantou, foron os momentos máis álxidos dunha segunda parte da actuación que para moitos era unha viaxe cara a principios dos 2000.

Con "Minority" e "Good Riddance" dixeron adeus, pechando unha noite inesquecible para os amantes do punk e do rock, que volveron a entoar "I hope you had the time of your life".