Abre o prazo para presentar a declaración da renda por teléfono
Abre o prazo para presentar a declaración da renda por teléfono
Os que prefiran acudir ás oficinas da Axencia Tributaria deberán agardar ata o 3 de xuño
Nos municipios de menos de tres mil habitantes, os maiores de 65 anos poderán recibir atención por videoconferencia en depedencias municipais
O prazo para presentar a declaración da renda por teléfono comeza este martes, do mesmo xeito que o novo programa que permitirá aos contribuíntes maiores de 65 anos que vivan en municipios pequenos recibir atención por videoconferencia.
A campaña do IRPF de 2023 arrincou o pasado 3 de abril para a presentación de declaracións por Internet, e desde entón máis de 7 millóns de contribuíntes entregaron a súa declaración. Deles, máis de 4 millóns recibiron a súa devolución, por máis de 2.400 millóns de euros.
Agora ábrese o prazo para presentar a declaración por teléfono, a través do Plan Chamámoslle (sic), polo que o contribuínte solicita unha cita previa e, no día e hora acordado, a Axencia Tributaria chámao para confeccionar e presentar a súa declaración por teléfono.
Este servizo, que foi gañando peso e que utilizaron máis dun millón de contribuíntes na campaña de 2022, está dispoñible para quen cumpra certos requisitos, entre eles que as súas rendas do traballo non superen os 65.000 euros ou que non teñan máis de dous inmobles en alugueiro.
Ademais, este martes tamén se abre un novo servizo da Axencia Tributaria polo que se prestará atención por videoconferencia aos maiores de 65 anos que vivan nun dos 543 municipios de menos de 3.000 habitantes adheridos ao programa.
Con este servizo, os contribuíntes interesados poderán acudir ao local habilitado polo seu concello para recibir atención por videoconferencia para a confección e presentación da declaración, igual que na atención presencial en oficinas.
A última canle que abrirá prazo para presentar a declaración da renda é a atención presencial en oficinas, que comezará o próximo 3 de xuño, con cita previa que se pode solicitar desde o 29 de maio.
O prazo para presentar a liquidación terminará en todos os casos o 1 de xullo, salvo para aqueles contribuíntes con declaración a ingresar que queiran domiciliar o resultado, que terán que facelo antes do 26 de xuño.
A Axencia Tributaria espera recibir 23,3 millóns de declaracións nesta campaña, a maioría (14,6 millóns) a devolver, por un importe total de 11.650 millóns de euros.
