Iberia cancela a compra de Air Europa polas esixencias da UE

Iberia cancelou a operación de compra de Air Europa porque "na actual contorna regulatoria" continuar coa operación "non redundaría en beneficio dos accionistas", comunicou este xoves a primeira compañía aérea á Comisión Nacional do Mercado de Valores (CNMV).

International Airlines Group (IAG) -que integra a Iberia, British Airways, Vueling, Aer Lingus e Level- ofrecera desfacerse do 52 % das rutas operadas por Air Europa en 2023 para obter a aprobación das autoridades de competencia da Unión Europea (UE), que, con todo, seguían tendo obxeccións á fusión.

Fontes de Iberia explicaron que as esixencias da Dirección Xeral de Competencia da Comisión Europea para dar luz verde á operación son tan altas que deixa de ter sentido empresarial para Iberia, polo que decidiron non seguir adiante.

Segundo estas fontes, a cesión a outros competidores de ata o 52 % das frecuencias de Air Europa e a garantía de que ningunha das rutas en que a Comisión Europea identificara problemas de competencia quedaba sen un terceiro operador avalaban a fusión.

Iberia e IAG presentaran unha listaxe de posibles competidores aos que se ceden as rutas "moi sólidas", algunhas das cales (como Volotea e Avianca) subscribiran alianzas entre elas para poder realizar as operacións coas maiores garantías.

Todo isto foi insuficiente para a Comisión, polo que a compra de Air Europa "deixa de estar entre os nosos obxectivos", din as mesmas fontes, que "lamentan a negativa de Bruxelas a aceptar esta ambiciosa proposta".

Lembran que Bruxelas acaba de aprobar outras operacións de consolidación do sector aéreo (a compra de ITA por Lufthansa) "e cremos que a nosa proposta reunía todas as condicións para seguir o mesmo camiño".