Illa comprométese a "unir" os cataláns na toma de posesión como presidente da Generalitat
Illa comprométese a "unir" os cataláns na toma de posesión como presidente da Generalitat
No seu primeiro discurso promete "unir" os cataláns ante o avance de "propostas divisivas" e fronte ao populismo que "pon en perigo a convivencia"
O novo mandatario catalán ultima un goberno de carácter técnico para evitar receos dos seus socios de investidura
Proxecta tamén unha ampla remuda na cúpula dos Mossos, facilitada tras o dispositivo frustrado para a detención de Puigdemont
Salvador Illa, novo presidente da Generalitat, tomou posesión do seu cargo este sábado ao mediodía no Salón Sant Jordi do Palau. O acto solemne consistiu na lectura do nomeamento por parte de Josep Rull, presidente do Parlament, e posteriormente Pere Aragonès colocoulle a medalla que acredita ao socialista como president.
Illa pechou o acto cunhas palabras xa como 133 presidente da Generalitat. Comezou o discurso cun agradecemento e recoñecemento a todos os presidentes que o precederon no cargo.
Promete gobernar "respectando a diversidade" fronte ao populismo que "pon en perigo a unidade civil e a convivencia mesma". O president agradeceulle a Aragonès un traspaso de responsabilidades "exemplar, respectuoso e eficaz" e prometeu gobernar para unha Cataluña diversa.
Tras elas interpretouse Els Segadors, himno de Cataluña, como remae da toma de posesión.
Asistiron ministros de ambos os socios do Goberno, entre eles, a vicepresidenta primeira e ministra de Facenda, María Jesús Montero; o ministro da Presidencia, Xustiza e Relacións coas Cortes, Félix Bolaños, a de Ciencia, Innovación e Universidades, Diana Morant e o ministro de Cultura, Ernest Urtasun.
Illa convértese así no terceiro presidente da Generalitat saído das filas do PSC, despois de Pasqual Maragall (2003-2006) e José Montilla (2006-2010), e pon fin a un ciclo de catorce anos de presidentes soberanistas.
Mentres, todos os ollos seguen postos na reaparición e posterior fuxida do expresidente catalán, Carlos Puigdemont que comunicou o venres pola noite na súa conta oficial de X que está en Waterloo, despois de fuxir o xoves de Barcelona.
Goberno transversal de perfil técnico
Illa presidirá de momento un goberno monocolor de acusado perfil técnico. Dise que a partir do outono podería incorporar algún representante dos comúns. Polo de agora só transcendeu o nome de dous futuros consellers. Alber Dalmau, actual xerente do concello de Barcelona, será conseller de presidencia e Nuria Parlón, alcaldesa Santa Coloma de Gramanet, estará á fronte do Interior.
