Impiden a un traballador elixir en que horario reducir a xornada ao ser insubstituíble
Impiden a un traballador elixir en que horario reducir a xornada ao ser insubstituíble
O xulgado recoñécelle o dereito a reducir nun 50 % a súa xornada para conciliar a vida laboral e familiar, pero non a escoller o tramo horario por causas "organizativas" alegadas pola empresa
![](https://img-g24-crtvg.flumotion.com/prog24/2022/20220210/CRUZVERMELLABUSCAFAMILIAACOLLIDABEBESOURENSE_frame_760.png)
Un xulgado de Burgos recoñeceulle a un traballador o seu dereito á redución do 50 % da súa xornada para conciliar a vida laboral e familiar, aínda que ao ser insubstituíble nas súas funcións rexeitou que a realice no tramo horario por el elixido, que non coincide coas necesidades da empresa.
Nunha sentenza datada o pasado 12 de marzo á que tivo acceso EFE, o Xulgado do Social nº 3 de Burgos estima parcialmente a demanda dun traballador siderometalúrxico, e recoñece o seu dereito á redución de xornada nun 50 % pero non á concreción horaria que pedía.
O seu horario era desde as 8:00 ás 17:00 no inverno, con 1,5 horas de flexibilidade na entrada, e desde as 8:00 ás 15.00 no verán.
En decembro de 2023 o traballador solicitou á empresa unha redución de xornada dun 50 % para o período comprendido entre o 8 de xaneiro e o 23 de marzo de 2024, en horario de 9:00 a 13:00 para atender o coidado da súa filla menor, de cinco anos.
A empresa ofreceulle total flexibilidade horaria ou teletraballar, pero o empregado alegou que o vía "moi complicado" e que, "facendo un esforzo", podería traballar o 70 % da xornada con inicio de traballo ás 8:30.
No seu departamento prestaban servizos outros tres traballadores, un deles de dirección, pero ningún deles posuía a cualificación do demandante.
Para negarlle a posibilidade de traballar na franxa horaria que o traballador pedira, a empresa alegaba que iso prexudicaba "totalmente ao proxecto que se está levando a cabo por razóns organizativas"; así mesmo, sinalaba a existencia de "fraude e mala fe no traballador ao efectuar esta petición" e poñía en dúbida a súa necesidade de entrar ás 9:00 da mañá, "porque a súa filla entra ao colexio a esa hora, polo que tampouco lle daría tempo a levala".
O xulgado sinala que resulta "canto menos rechamante" que o traballador exclusivamente solicitase a redución de xornada para un período de 2 meses.
Cuestión distinta, indica a sentenza, é que poida elixir o tramo horario no que traballar, e neste punto os argumentos e as causas organizativas expostas pola empresa son "totalmente razoables".
A empresa xustificou o prexuízo organizativo, xa que o traballador "ten un labor moi específico resultando moi complicado atopar persoas do seu perfil que, a curto prazo, poidan realizar as súas tarefas".
Proba diso é o salario que percibe, máis de 40.000 euros anuais, fronte aos 25.855 que recoñece o convenio colectivo para os oficiais de 2ª.