Incentivos para aprender inglés na hostalaría

Un hostaleiro de Monterrei ofrece 50 euros máis na nómina a súa empregada cando acade un nivel intermedio de inglés. Non atopaba persoal con coñecementos de idiomas que quixeran traballar no rural. A empresa tamén lles paga cursos de formación cando o persoal non pode asumilos.

María José Diéguez aprende inglés moi motivada, no traballo, na casa e todas as semanas vai a unha academia, en canto acade o nivel intermedio cobrará ao mes 50 euros máis.

"Un soño feito realidade porque despois de 27 anos traballando na hostalaría chegar a esta altura con 42 anos que che propoñan poder formarte no teu oficio, no que che gusta facer, é unha marabilla".

O xerente do Retiro do Conde, un hotel restaurante nun pazo do século XVII de Vilaza, ten claro que para conseguir na hostalaría persoal implicado, e máis no rural, hai que ofrecer boas condicións. 

"Ao chegar aquí o primeiro que me dixo foi o horario, estupendo, o salario, estupendo, por iso cambiei de traballo e ao dicirme o dos cursos que cada vez que fixera un curso me ía subir o soldo anima a calquera".

"O que necesito é que todo o equipo, axude, suba de nivel comigo, e se o empregado ve que a empresa se preocupa porque sexan mellor profesionais, síntese valorado e que quede moitos anos traballando con nós".

María José recentemente rematou un curso de maridaxe que a empresa lle pagou. Segundo o xerente, José Luís Prieto.

"Supoñíalle unha carga económica que non daba asumido e o que fixo a empresa foi financiarlle o curso e ela quedar co título".

Cada ano son máis os turistas estranxeiros que se aloxan nesta aldea de Monterrei para descubrir a zona, e para José Luis Prieto atendelos na súa lingua permite ofrecer un mellor servizo.