Incerteza nas academias pola fin da recuperación en setembro

Sen recuperacións en setembro para ESO e bacharelato, as academias perden unha das súas principais fontes de ingreso para os meses de verán.

Carlos Salgado, director dunha academia en Vigo, explica que manter un centro coma o seu tres meses pechado supón "un problema para o empresario e os traballadores".

Algúns consideran que a medida é positiva para que os estudantes poidan descansar e retomar o curso con ilusión. Buscan xa alternativas para ocupar eses meses. É o caso doutra directora, María Paz Alonso Rodríguez, que sinala que todos "os alumnos teñen dereito ao descanso", aínda que lamenta que a decisión "se tomase xa co curso empezado". Di que haberá traballo se queren abrir no verán e matiza que "é cuestión de resituarse".

Parte do sector estima que as academias que non sexan capaces de reorientar a súa actividade terán que pechar. Ademais do encarecemento das subministracións para manter abertas as instalacións, apuntan que tamén notan como nais e pais teñen cada vez máis dificultades para pagar este tipo de clases.