INCIBE alerta dunha campaña fraudulenta que suplanta a identidade de Abanca
INCIBE alerta dunha campaña fraudulenta que suplanta a identidade de Abanca
As vítimas da citada campaña están a recibir SMS indicando que se realizou un cargo na súa conta cun enlace que redirixe a unha páxina web maliciosa que suplanta a oficial.
O Instituto Nacional de Ciberseguridade alertou este luns de que se detectou unha campaña de correos electrónicos fraudulentos que suplanta a identidade da entidade financeira Abanca.
Segundo precisou o centro tecnolóxico por medio dun comunicado, as vítimas da citada campaña están a recibir SMS indicando que se realizou un cargo na súa conta, un acceso non autorizado ou unha actividade sospeitosa, cun enlace que redirixe a unha páxina web maliciosa que suplanta a oficial.
O centro tecnolóxico con sede en León aconsella a quen recibira dito SMS e non accederon ao enlace ou si que o fixeron, pero sen cubrir os datos, que o marquen como spam e que o borren da bandexa de entrada.
No caso de que si cubriran o formulario da páxina falsa coas súas credenciais, a recomendación é que contacten de inmediato coa entidade bancaria e expliquen o sucedido.
Ademais, aconsella cambiar os datos de acceso á conta, empregando un contrasinal forte, e recompilar probas do suceso, facendo capturas de pantalla das mensaxes e proceso na URL fraudulenta, se é posible.
Finalmente, coas evidencias que se puideran obter, presentar unha denuncia, adxuntando ditas probas, ás Forzas e Corpos de Seguridade do Estado, da que deberá dar copia á entidade financeira.
Por último, aconsella nas próximas semanas e meses, revisar os movementos da conta para comprobar que non se fagan pagos non autorizados.
