Ingresa en prisión tras ser detido en Ferrol con dous quilogramos de cocaína

Un home ingresou en prisión por orde xudicial tras ser detido en Ferrol o 1 de setembro por axentes da Policía Nacional cando transportaba dous quilogramos de cocaína.

O apresamento produciuse froito da colaboración entre efectivos da comisaría de Ferrol-Narón e da Brigada Central de Estupefacientes (UDYCO), que identificou a este home que investigaba por se podería dedicarse a trasladar substancias estupefacientes desde Madrid a Ferrol.

Foi desta maneira como xa na cidade naval se procedeu ao rexistro do vehículo que conducía e se localizaron dous paquetes dun quilogramo cada un ocultos baixo o asento do copiloto. Unha vez analizados, puido constatarse que se trataba de cocaína. Os paquetes estaban identificados co logotipo dunha coñecida marca de moda.

Segundo a Policía Nacional, coa cantidade de que se incautaron poderían obterse e poñer á venda máis de 10.000 doses desa droga.