Os ocupantes do narcopiso desaloxado en Monte Alto tratan de ocupar outra vivenda
Os ocupantes do narcopiso desaloxado en Monte Alto tratan de ocupar outra vivenda
A presión veciñal logrou botalos dun domicilio sinalado como punto de venda e consumo de drogas
Un operario tapiou esta mañá a vivenda desaloxada
Esta mañá na rúa Washington en Monte Alto todo era caras de ledicia e de alivio. Alegría porque a presión veciñal de onte deu os seus froitos e alivio porque contra as dúas e media da mañá os dous ocupas que quedaban no interior desta narcovivenda abandonábana voluntariamente.
Unhas veciñas da zona din que é unha tranquilidade saber que xa non están e que esperan que non haxa represalias. Apuntan que nos anos oitenta tamén había moitos toxicómanos na zona pero que non atracaban á xente nin roubaban nos comercios da zona.
Unha alegría que comezou a torcerse contra as once e media da mañá, cando volveu aflorar a tensión entre os veciños que estaban na perolada de onte e os que non querían tanto rebumbio no barrio. Durante toda a noite e gran parte da mañá varias patrullas da policía fixeron quendas para custodiar a entrada do inmoble ata que chegou a autorización para tapiala.
![](https://img-g24-crtvg.flumotion.com/prog24/2024/20240207/tapiado-narcopiso-coruna-070224.png)
O obxectivo era que non volvesen entrar, pero os mesmos ocupas da rúa Washington xa puxeran o ollo nestoutra vivenda situada a escasos 400 metros. Afortunadamente a Policía Local actuou con rapidez e puideron desaloxar as seis persoas que había no interior.
Non foi a única tentativa de ocupación que conseguiron desbaratar. A propia policía aseguraba que no momento en que son desaloxados xa están buscando outra vivenda pola zona. Semella que o problema dos narcopisos non ten fácil solución en Monte Alto.