Interceptan en Verín un camioneiro que quintuplicaba a taxa de alcol máxima permitida
Interceptan en Verín un camioneiro que quintuplicaba a taxa de alcol máxima permitida
Tras inmobilizarlle o vehículo, o home dixo aos axentes que "ía cear un churrasco" mentres esperaba a que desaparecese a sintomatoloxía
(Garda Civil)
A Garda Civil de Ourense interceptou na autovía A-52 ao seu paso por Verín un camioneiro que quintuplicaba a taxa máxima de alcol permitida para condutores profesionais.
En concreto, eran as 20:50 horas deste domingo cando unha patrulla da Garda Civil foi requirida para auxiliar o condutor dun vehículo articulado que circulaba transportando mercadorías desde O Carballiño a Madrid e que rebentara un pneumático.
Á súa chegada, os axentes notaron que o condutor "desprendía un forte cheiro a bebidas alcohólicas", polo que lle efectuaron a proba, que lanzou un resultado positivo de 0,77 e 0,76 mg/l, quintuplicando desta maneira a taxa máxima establecida para este tipo de condutores.
Por todo iso, abriuse un procedemento como investigado como presunto autor dun delito contra a seguridade viaria. O camión quedou inmobilizado no lugar dos feitos e o home manifestou aos axentes que "ía a un establecemento próximo cear un churrasco" mentres esperaba a que desaparecese a sintomatoloxía.
