Invade Galicia competencias estatais ao limitar a 15 anos o prazo para actuar ante obras ilegais na costa?

O Xulgado do Contencioso-Administrativo número 1 de Pontevedra expuxo unha cuestión de inconstitucionalidade fronte a varios preceptos da Lei do Parlamento de Galicia 7/2022, do 27 de decembro, de medidas fiscais e administrativas, para que o Tribunal Constitucional se pronuncie sobre se invadiu as competencias estatais ao limitar a 15 anos o prazo en que a Administración autonómica pode reaccionar fronte ás edificacións construídas ilegalmente na zona de servidume de protección de costas (ZSPC). 

O maxistrado explica no auto que no artigo 10.1 da lei galega se fixou ese prazo de caducidade para reaccionar fronte ás obras ilícitas realizadas en zona de protección de costas.

Con todo, advirte que tanto a Axencia de Protección da Legalidade Urbanística (APLU) como o Tribunal Superior de Xustiza de Galicia e o Tribunal Supremo consideraron unanimemente que, contra esas construcións realizadas ilegalmente, tras a entrada en vigor da Lei de Costas (1988), se pode tramitar o procedemento de reposición física da legalidade en calquera momento, aínda que transcorresen 20 anos desde o fin da obra.

A lei si estableceu un prazo concreto (15 anos) para a execución forzosa da orde de demolición xa ditada, pero non para a incoación en si do procedemento de reposición da legalidade.

“Non é difícil deducir que dita norma autonómica ten como única finalidade a de beneficiar a quen infrinxiu a Lei de Costas na zona de servidume de protección do litoral galego, outorgándolles un privilexio singular fronte aos que cometen a mesma infracción no resto do litoral español”, salienta o maxistrado no auto, á vez que advirte que o fai “invadindo a competencia estatal en materia de costas, en detrimento dos valores ambientais e paisaxísticos que a súa lexislación básica pretende preservar”.

 Ademais, recalca que esa medida non constitúe unha “norma adicional de protección” do dominio público marítimo-terrestre, “pola contra, prevalece o interese particular de quen incumpriu o réxime básico esencial de protección do dominio costeiro sobre o xeneral ambiental e paisaxístico respecto dunha zona especialmente sensible e vulnerable, que os poderes públicos deben preservar”.