Investigan se a morte dun senteito en Vigo puido deberse a causas violentas
Investigan se a morte dun senteito en Vigo puido deberse a causas violentas
Unha caída ou golpe fortuíto, unha pelexa ou mesmo unha agresión, cuestión que agora tratan de determinar
A Policía Nacional investiga se a morte dun senteito de 48 anos, sucedida o pasado 19 de xullo, púidose deber a causas violentas.
O cadáver deste home atopouno sobre as dúas da tarde un veciño na rúa Alfonso XIII, baixo a AP-9.
A persoa que atopou o corpo chamou os Servizos de Urxencias 061, que á súa vez advertiron o 112 Galicia. Mobilizouse tanto a Policía Nacional como a Policía Local, que xa no momento determinaron que se trataba dunha morte para investigar a nivel xudicial.
Activouse entón o protocolo para que interviñesen tanto a policía científica como a xudicial, e o cadáver foi enviado ao hospital Nicolás Pena para practicarlle unha autopsia.
O resultado do exame, segundo confirmaron fontes policiais, determina unha lesión previa, aínda que non necesariamente determinante na causa do falecemento.
Iso implica que puido deberse a diferentes razóns: unha caída ou golpe fortuíto, unha pelexa ou mesmo unha agresión, cuestión que agora trata de dilucidar a policía para saber se puido tratarse dunha morte homicida.
