Israel ordena ao exército tomar máis territorio en Gaza e ameaza coa súa anexión

O ministro de Defensa israelí Israel Katz ordenou este venres ao exército apoderarse de máis territorios en Gaza, sen especificar cales, e ameazou a Hamas coa anexión destes a Israel se o grupo islamista non libera os reféns: "Canto máis manteña Hamas o seu rexeitamento, máis territorio perderá, e será anexionado a Israel", dixo nun comunicado difundido polo ministerio.

"Ordenei ao exército que ocupe áreas adicionais en Gaza mentres evacúa a poboación e tamén expandir as zonas de seguridade ao redor de Gaza para protexer as comunidades israelís e os soldados das forzas armadas", anunciou Katz á primeira hora da mañá.

Ata o momento, Israel ordenou a evacuación dos barrios orientais da cidade de Khan Yunis, no sur de Gaza, e da localidade veciña de Beni Suheila. Tamén ordenou a evacuación de Beit Lahia, no norte, onde as tropas lanzaron unha operación terrestre.

Ademais, as forzas armadas ocuparon parcialmente o corredor de Netzarim, co que Israel separou durante a guerra o norte e o sur de Gaza, e chamou á poboación do norte a evacuar cara ao sur a través da estrada de Rashid, que atravesa a Franxa paralela á costa.

O titular de Defensa asegurou que Israel utilizará todos os métodos militares e civís para poñer presión a Hamas para liberar os 59 cativos que seguen na Franxa, incluso evacuar a poboación de Gaza ao sur e poñer en funcionamento o plan de transferencia voluntaria de Trump para os residentes do territorio palestino.

O plan de "transferencia voluntaria", que numerosas organizacións internacionais e a poboación árabe criticaron como un plan de limpeza étnica dos gazatís, alude a unha evacuación "voluntaria" da súa poboación, aínda que esta leva sometida desde hai case ano e medio a unha guerra que custou a vida de preto de 50.000 persoas e unha crise humanitaria sen precedentes.

Katz asegurou novamente no comunicado que Israel aínda aposta pola proposta do enviado da Casa Branca en Oriente Medio, Steve Witkoff, para a liberación de todos os secuestrados, os vivos e os mortos, por adiantado e en dúas etapas, cun cesamento do fogo no medio.

A proposta implica unha extensión da primeira fase do cesamento do fogo duns 50 días, na que a metade dos reféns ían ser liberados na primeira xornada e a outra metade na última.

A primeira fase do cesamento do fogo chegou á súa fin o 2 de marzo, día en que comezaría a segunda fase, que implicaba o final sostible das hostilidades en Gaza e a posta en liberdade dos secuestrados no territorio palestino.

Con todo, as negociacións desa segunda etapa non chegaron a producirse, e a primeira concluíu deixando a Gaza nun impasse ata que Israel rompeu definitivamente o cesamento do fogo cunha onda de bombardeos o pasado martes de madrugada, que mataron palestinos a centos.

O grupo islamista Hamas nunca aceptou a proposta de Witkoff e reclamou desde un primeiro momento que se cumprise o acordo asinado orixinalmente e se pasase á segunda fase.