Dúas grandes saídas permítenlle a Jorge Prado gañar no Trentino desde a 17ª praza
Dúas grandes saídas permítenlle a Jorge Prado gañar no Trentino desde a 17ª praza
Fixo un 17º na clasificación, pero conseguiu poñerse en cabeza e só foi superado por Febvre e Gajser
Na segunda quenda, resistiu a presión de Febvre, que acabou caendo e rematou de quinto
É a quinta vez que Prado vence en Pietramurata
Na primeira carreira do Grande Premio de Pietramurata, no Trentino, Jorge Prado salvou unha situación complicada. Saía moi atrás na grella (17º), despois dun problema mecánico nos adestramentos, pero conseguiu aproveitar a súa velocidade para poñerse en cabeza na primeira volta.
Detrás del metéronse Febvre e Gajser, moi ambiciosos durante toda a fin de semana. Mediada a proba o francés conseguiu superalo e pouco despois era Gajser o que se poñía na segunda posición. Jorge Prado mantivo a terceira praza pensando na segunda carreira.
A segunda quenda volveu comezar cunha gran saída de Jorge Prado. O lugués tirou da súa gran especialidade, e volveu superar todos os pilotos para colocarse de primeiro, seguido por Romain Febvre. Gajser non saía ben e víase obrigado a remontar posicións, mentres que Herlings caía na primeira curva e perdía todas as opcións.
Jorge Prado marchaba na cabeza resistindo as acometidas de Romain Febvre, que buscaba o GP perfecto logo da vitoria na carreira de cualificación e na 1ª quenda. O francés meteulle a moto na 4ª volta, pero Prado aguantou. E despois cometeu un erro, quedando relegado á quinta praza, o que lle daba a vitoria no GP a Prado. Sen oposición, ao campión mundial vixente só lle quedou pilotar coa tranquilidade que o caracteriza para asegurar a vitoria na quenda, e na fin de semana.
Cos resultados finais, Prado sae do Trentino cunha vantaxe sobre Gajser de 13 puntos, so catro menos que antes da cita. A Febvre sácalle 45. Ademais, Jorge Prado acumula catro vitorias nos catro grandes premios disputados ata o momento no mundial.
