Juan Pardo, Carlos Núñez e Luz Casal reciben a Medalla de Galicia 2023

A Cidade da Cultura acolleu este luns a cerimonia de entrega das Medallas de Galicia, a máxima condecoración que entrega o Goberno galego. A música foi a protagonista desta 39 edición, xa que os galardoados foron Juan Pardo, Carlos Núñez e Luz Casal.

Tras 20 anos afastado dos escenarios, Juan Pardo fixo unha excepción para recoller a Medalla de Galicia, unha palabra, dixo, que sempre estivo na súa boca como compositor, cantante e produtor.

Carlos Núñez comprometeuse a intentar seguir levando a alma de Galicia polo mundo e agradeceu o recoñecemento no idioma en que mellor se expresa: o da gaita.

Luz Casal dedicoulle a medalla á súa vila natal, Boimorto, e á súa familia, que sempre viviu co peso de verse obrigada a emigrar. 

"Estou completamente segura de que se estivesen aquí todas aquelas sensacións que lles causaban dor serían compensadas con esta medalla", confesou a cantante.

"Intérpretes dun pobo inmenso"

O presidente da Xunta, Alfonso Rueda, reivindicou no seu discurso Galicia como un lugar propicio para a creación, grazas, dixo, a unha idea de galeguidade que non entende de fronteiras.

"Luz Casal, Juan Pardo e Carlos Núñez son intérpretes dun pobo inmenso e dun tempo longo. Representan esa Galicia fiel a si mesma que nunca renuncia a facerse presente a outros públicos, e tampouco renuncia a asimilar outras culturas para seguir enriquecéndose. Galicia soa ben, hoxe mellor ca nunca. Galicia é unha comunidade harmoniosa e afinada", afirmou Rueda.

A cerimonia rematou co himno galego interpretado por Carolina Rubirosa.