Lea por unha lámpada en Santa Rita de Xuvia

Unha lámpada de máis de cen anos enfronta o cura e os fregueses de Santa Rita de Xuvia, en Narón. O cura afirma que a quitou porque había perigo de que caese e que ninguén quería afrontar os seis mil euros que custa a súa restauración. Mentres que os veciños piden que se volva colocar, xa que non consultaron a ninguén para quitala.

A lámpada é obra do Real Fábrica de La Granja de San Ildefonso de Segovia, tallada en cristal de roca e doada hai máis dun século pola familia que construíu a igrexa. Os veciños aseguran que ten gran valor histórico e artístico e que o cura de xeito unilateral quitouna da igrexa.

Pola súa banda o cura asegura que ten a estrutura interna danada e que podía caer en calquera momento causando unha desgraza. Di que informou os fregueses de que amañala custaba seis mil euros e que ninguén quixo saber nada do problema. Falou coa familia doadora e non viron problema en que se descolgase. A lámpada segue estando na igrexa, pero sen colgar. Conta que hai dous anos se fixo un arranxo parcial debido ao custo que supoñía. Ademais a iluminación actual é de focos, polo que a lámpada sería un elemento soamente decorativo.

Os fregueses insisten en repoñer a lámpada e outras doazóns que, afirman, tamén se retiraron da igrexa. As persoas que piden que se repoña a lámpada no seu lugar orixinal afirman que non se lles consultou nada, que a lámpada está deteriorada detrás dun altar agochada nun burato para que non se vexa e a parroquia ten cartos suficientes para afrontar ese gasto.