Longas ringleiras na Coruña para protestar polas facturas da luz

A oficina de Naturgy situada na rúa Betanzos, na Coruña, é unha das que máis visitas está a recibir ultimamente. E á vista está. Desde unha hora antes da súa apertura, aquí, amoréase arredor dunha vintena de consumidores para queixarse pola súa factura da luz.

Todos eles están no mercado regulado e aproveitan para cambiarse ao libre coa intención de aforrar cartos.

A mesma situación atopámola, por exemplo, en Arteixo. Aquí, mesmo hai quen anda á procura de ofertas que minoren o gasto mensual.

Outra queixa frecuente é o atraso das facturas. Moitos din que non as reciben desde o pasado mes de setembro e que xa tremen polo importe que lles vai tocar aboar.

Case todos teñen a esperanza de que o seu recibo sexa un erro. Pero na maior parte dos casos, non o é.