Lucía Casal, gandeira de 20 anos de Melide, Premio Nacional de Xuventude 2023

Lucía Casal trata as vacas como mascotas e a elas parece gustarlles. Leva 20 anos entre elas xunto a cabalos, coellos, porcos e pitas na granxa familiar de Melide. É unha granxeira da nova xeración do rural e leva o negocio xunto a seu pai, mentres non para de estudar. Xa fixo Forestais, agora vai empezar Auxiliar de Veterinaria e logo pretende facer a carreira. A actual Premio Nacional de Xuventude na categoría de Medio Ambiente, é gandeira por vocación e séntese moi fachendosa de gañar, representando a outros coma ela.

Foi grazas a un escrito e un vídeo onde contaba o día a día do seu traballo con respecto ao medio natural. Nese momento estaba nunha granxa en Irlanda nun intercambio Erasmus, erguéndose ás 4 e media da mañá e sen parar de traballar ata as seis da tarde. A súa visión do futuro da gandería e do rural convenceu o xurado axiña: facer unha gandería máis sostible e fácil, sen vacas estabuladas. E para eso, aproveitar a teconoloxía e o saber tradicional por igual. 

Os seus pais, ela cunha tenda de moda e el gandeiro, son o seu máximo apoio. E logo os 14 mil seguidores en TikTok, a maior parte da alta montaña de Cantabria e algúns "haters", conta, que lle fan pensar que o está facendo ben.

"Sempre fun de ideas fixas e propoñerme retos a min mesma, eu entendo que vou estudar  pero teño claro que aquí quero chegar a uns obxectivos e vouno facer, porque se a xente nova se vai do campo, que vai ser, volver a España baleirada, conservar o que temos, os avós loitaron por isto, e nós temos que agradecelo".

É consciente de que é unha rareza entre as súas amizades, sobre todo, mulleres, pero ten moi claro o seu futuro e todo pasa por ter vacas felices.