Xa son 87 os mortos tras afundir un barco con inmigrantes na costa siria

Polo menos 87 persoas morreron e outras 20 foron rescatadas con vida despois de que unha barcaza con inmigrantes a bordo afundira o xoves fronte ás costas de Tartús, en Siria, informou o Ministerio de Saúde sirio.

Nun comunicado reproducido pola axencia de noticias oficial siria SA, o departamento indicou que o reconto de vítimas é aínda preliminar e que os rescatados están a recibir tratamento nun hospital de Tartús.

Pola súa banda, o Observatorio Sirio de Dereitos Humanos dixo nun comunicado que as autoridades están a buscar ao redor de 50 persoas aínda desaparecidas que viaxaban na embarcación.

Algúns dos sobreviventes confirmaron á ONG que a barcaza transportaba máis de 150 persoas con destino a Italia, Chipre ou outros países europeos.