Malestar veciñal en Silleda polas ruidosas molestias dun polémico pub

Veciños da rúa Venezuela, en Silleda, estanse a unir para lle poñer freo a un problema que lles quita o sono. Literalmente, porque é diso do que se queixan, de non poder descansar polas noites polo ruído que sae dun pub. 

Trátase dun local, o Dejavu, que normalmente din os veciños abre ás 6 ou 7 da tarde e nas fins de semana, cando pecha as súas portas arredor das 5 da maña, a festa segue no interior. Denuncian estar fartos, tanto do ruído pola falta de insonorización como da inseguridade e insalubridade que xeran nesta rúa e nas máis próximas a ela.

Levan denunciado dende hai meses a situación e recolleron polo momento 70 sinaturas entre a veciñanza para tratar de convencer o Concello de que actúe con máis contundencia. Os propietarios tiveron outro local nesta mesma rúa, a bastantes metros de distancia, e algúns veciños xa comentaban que ata que pechou os problemas eran similares aos que sofren agora os que viven máis preto do establecemento.