Manos Limpias amplía a denuncia contra Begoña Gómez e apunta a Sánchez como "colaborador"

O sindicato Manos Limpias transformará nunha querela a denuncia contra a muller do presidente do Goberno, e presenta unha ampliación con novos datos. Pídelle ao xuíz que reclame á Moncloa os teléfonos de Begoña Gómez e o seu rexistro de chamadas. 

E presenta un informe xurídico centrado nas axudas millonarias a Globalia, o grupo propietario de Air Europa.  O rescate da aeroliña é, segundo o sindicato, a operación que podería implicar o presidente do Goberno. Manos Limpias sostén que Pedro Sánchez estaba ao tanto dos negocios da súa muller e puido ser presuntamente "encubridor e colaborador necesario". 

Miguel Bernad, o secretario xeral do sindicato, aclara que os documentos achegados por eles non son unha denuncia directa contra Pedro Sánchez. "Seguimos centrados en Begoña Gómez", asegura. Pero apunta a que se o xuíz de Madrid apreciara indicios de responsabilidade no papel do presidente, tería que inhibirse e deixar o caso nas mans do Tribunal Supremo. 

A denuncia que deu orixe ao caso basease en informacións publicadas por varios medios de comunicación. Agora este novo documento foi elaborado directamente por eles. 

De momento, o xuíz chamou a declarar a catro xornalistas, pero Manos Limpias, non descarta que proximamente encargue máis dilixencias de investigación. E acusa o fiscal de entorpecer a investigación. Como exemplo pon que recorrera a apertura da causa directamente diante da Audiencia Provincial en lugar de pasar antes polo propio xuíz.