Matteo Messina Denaro, o último padriño

Coa detención este luns de Matteo Messina Denaro, considerado o último "xefe de xefes" da Cosa Nostra, a mafia de Sicilia  e o home máis buscado de Italia, conclúe unha historia de sangue, poder e do hermetismo que o protexeu durante 30 anos.

O "último padriño", de 60 anos, foi detido na clínica privada La Maddalena de Palermo, a capital siciliana, onde acudira para un tratamento médico coa prepotencia de saberse protexido por unha rede que lle permitía estar oculto ao mundo durante 30 anos na súa Sicilia natal.

O fuxitivo, coñecido cos alcumes de U siccu (o delgado, en siciliano) ou Diabolik porque lle gustaba o coñecido ladrón do famoso cómic, naceu na localidade siciliana de Castelvetrano e o seu pai, Don Ciccio, era xa o xefe da mafia de Trapani.

Aos poucos foi ascendendo postos na Cosa Nostra e os investigadores consideraran que se converteu no "xefe de xefes" da mafia siciliana xa desde o seu agocho tras o arresto de Toto Riina, hai xusto 30 anos, e posteriormente de Bernardo Provenzano, que estivo fuxido da xustiza 38 anos.

Messina Denaro levaba prófugo desde o verán de 1993, cando nunha carta escrita á súa entón noiva, Ángela, tras os masacres mafiosos de Roma, Milán e Florencia, anunciáballe o comezo da súa vida como fuxido da Xustiza. "Oirás de min (dando a entender que sabía que pouco tempo despois o seu nome sería asociado a un grave derramamento de sangue) e pintaranme como un demo, pero todo son falsidades", escribía.

A última sentenza considérao o cerebro dos atentados que provocaron a morte dos dous maxistrados antimafia en 1992, Paolo Borsellino e Giovani Falcone, a esposa deste, Francesca Morvillo, e oito axentes da escolta.

Ademais, acumulaba varias condenas perpetuas por decenas de asasinatos, entre eles o do pequeno Giuseppe Dei Matteo, o fillo do colaborador da xustiza estrangulado e disolto en ácido tras case dous anos de cativerio.

Nestes anos coñecéronse algúns detalles da súa vida como que, a pesar de ser o home máis buscado de Italia, isto non lle impediu viaxar a Barcelona para operarse da vista, como demostraron en varias investigacións.

O poder do considerado último xefe de Cosa Nostra, o último dos "corleoneses", demóstrase non só na súa ampla rede de contactos e homes de palla que se procurou nestes anos, senón que tamén se pode cuantificar nos máis de 4.000 millóns de euros que se confiscou á súa contorna.

Segundo os investigadores, Messina Denaro continuou desde a clandestinidade impartindo ordes na Cosa Nostra, como proban os "pizzini", os anaquiños de papel cos que se comunican os seus membros, interceptados pola Policía italiana nos últimos anos.

Del só se tiñan unhas poucas fotografías de hai 30 anos e o último retrato robot inclúe novos detalles confiados á policía por parte dalgúns dos detidos da súa contorna, que son incriblemente similares aos que se puideron ver nunha fotografía divulgada hoxe polas autoridades, en que se ve nun coche cos carabineiros que o arrestaron.

Nesta imaxe aparece máis envellecido, co pelo tinguido de negro, con algo máis de peso, pero sobre todo sen as lentes escuras coas que se coñecía debido a problemas de vista.

Aínda que a súa figura estivo sempre rodeada de lendas, os investigadores apuntaban a que o escorregadizo capo da Cosa Nostra era unha personalidade moi diferente á do resto de xefes mafiosos como Riina e Provenzano, de escasa intelixencia e escondidos durante anos no medio do campo en pésimas condicións.

De Messina Denaro falábase da súa grande intelixencia e que amaba o luxo, as viaxes, os automóbiles e a roupa, e agora, tras a súa detención, poderanse aclarar moitas destas lendas que se construíron durante anos.