Mazón acepta xestionar a crise coa intervención do Goberno

O presidente da Generalitat Valenciana, Carlos Mazón, anunciou este sábado a creación de cinco grupos de resposta inmediata para paliar as consecuencias da Dina.

Solicitoulle ao Goberno a incorporación aos equipos de traballo de sete ministros e do Xefe do Estado Maior da Defensa.

O Goberno acepta participar nos grupos

O Goberno respondeulle que estará nos cinco grupos e que formarán parte ministros, secretarios de Estado ou técnicos "en función das necesidades".

Fontes do Executivo tamén sinalaron que sobre a coordinación das Forzas Armadas “o máximo responsable é o xeneral Xefe da Unidade Militar de Emerxencias, que xa está a coordinar os militares despregados".

O Goberno subliñou ademais que en todo caso a primeira prioridade segue sendo salvar vidas, recuperar os corpos das vítimas mortais e restablecer os servizos básicos, como explicou esta mañá o presidente do Executivo, Pedro Sánchez.

Mazón anuncia cinco comités de acción urxente

Mazón detallou que creará un grupo centrado nas cuestións sanitarias, e pediu a incorporación “inmediata” da ministra de Sanidade, Mónica García, para a elaboración dun plan urxente de avaliación dos riscos epidemiolóxicos e para actuar nos mecanismos de prevención. Para iso pídese que se incorpore tamén membros do centro de coordinación de alerta sanitaria xunto aos “mellores preventivistas de España”, os membros de saúde pública da Comunidade Valenciana e o centro de coordinación de alerta e emerxencia dependente do Goberno.

O segundo grupo de resposta inmediata estará centrado nos transportes e a infraestrutura, para o que Mazón pediu a asistencia do ministro de Transportes, Óscar Puente, para crear un plan integral urxente de recuperación da rede a nivel local, provincial, autonómico e nacional.

O terceiro grupo estará centrado a vivenda e os servizos sociais. Mazón pediu a incorporación da ministra de Vivenda, Isabel Rodríguez; e do ministro de Dereitos Sociais, Pablo Bustinduy; para aplicar medidas urxentes de realoxamento e reconstrución de vivendas de afectados e asistencia social inmediata. Entre as peticións de Mazón está outorgar subvencións directas, sen burocracia, para persoas dependentes ou vulnerables, mobilizar todo o parque público de vivenda estatal para todos os realoxamentos necesarios e a intermediación bancaria para o aprazamento de hipotecas ou préstamos persoais de quen se viu afectados.

“A prioridade é a súa tranquilidade e benestar”, afirmou Mazón.

O cuarto grupo traballará en emprego e nas empresas. Mazón pediu que se incorporen a vicepresidenta segunda e a ministra de Traballo, Yolanda Díaz; e o ministro de Economía, Carlos Corpo; para habilitar todos os instrumentos legais para compatibilizar os ERTE, como se fixo na pandemia. Para os autónomos e agricultores, solicita “o mesmo, pero referido a prestación por cesamento de actividade”. Mazón tamén pediu a habilitación legal para poñer en marcha onde se poida o teletraballo.

No último grupo de resposta de Interior, pediu a incorporación do ministro de Interior, Fernando Grande-Marlaska, para reforzar os efectivos e aumentar o control de seguridade e acceso a zonas afectadas para previr roubos e pillaxe. “Necesitamos máis efectivos controlando nas rúas”, dixo Mazón.

O presidente da Comunitat Valenciana, tamén solicitou “formalmente a revisión e actualización o protocolo da Dirección Xeral de Protección Civil do Ministerio de Interior para notificar e comunicar as alertas meteorolóxicas e de emerxencia en España”.

Á marxe dos grupos, Mazón solicitaba “o estudo da incorporación do Xefe do Estado Maior de Defensa” para coordinar os labores do exército e avaliar futuras necesidades.

Asegurou Mazón na súa comparecencia ante a prensa que "estamos ante o reto da nosa vida" e que comparte a dor ou a frustración pero aseguroulles aos seus veciños que van chegar a todos os fogares sexa como sexa na axuda que precisen.