Medra a oferta de barcos como vivendas turísticas no porto de Vigo

Como a maior parte do tempo o iate estaba atracado no peirao, José Antonio comezou a pensar no xeito de sacarlle máis proveito ao investimento. Decidiu daquela utilizar o barco como morada ocasional para outras persoas. "É un barco que merquei no seu tempo por afección á navegación, e por sacarlle algo de rendemento ao gasto alúgoo baixo a modalidade de booking", sinala José Antonio Gómez, propeitario do barco Pura Vida, que oferta como aloxamento turístico.

E dende hai cinco anos figura nunha coñecida plataforma de aloxamentos turísticos. Un veleiro de trinta e sete pés, once metros de eslora e catro de manga convertido nunha vivenda turística. Dispoñible para parellas, grupos e familias. "Para durmir de noite dunha forma cómoda, alugámolo para catro persoas, dúas por cada camarote", comenta José Antonio.

Tarifas desde 65 ata 100 euros por persoa e noite, segundo sexa tempada baixa ou alta. O produto ten unha demanda crecente sobre todo entre os estranxeiros. "Á xente estalle gustando e cada vez temos máis usuarios. Teño moita xente de Portugal. Atópome tamén con moitos hóspedes ingleses, algún americano. A verdade é que o 70 % dos usuarios son estranxeiros", asegura o promotor turístico.

En principio só o aluga para aloxamento, aínda que en casos especiais podería saír a navegar. "Entre xullo e agosto, se hai dispoñibilidade de patrón, pois organizamos unha saída, pero realmente o noventa por cento das reservas son para só aloxamento", comenta José Antonio.

O número de casas flotantes medra na dársena da Laxe, no peirao do Náutico. Xa hai media ducia de embarcacións dese tipo, algunhas non poden navegar, pero completan a oferta hoteleira de Vigo coa experiencia diferente de durmir sobre a auga.