Mellora a situación en Ferrolterra e no Eume, onde a chuvia concedeu unha tregua
Mellora a situación en Ferrolterra e no Eume, onde a chuvia concedeu unha tregua
Ferrol, Fene, Narón e Cabanas son os municipios máis afectados polas intensas precipitacións
En Cabanas, sete das casas situadas na avenida da Madalena, moi preto da praia, quedaron anegadas. Todas están situadas por baixo do nivel do mar e os veciños, que piden solucións, cruzan os dedos para que as preamares non volvan coincidir con precipitacións tan intensas como as dos últimos días. Pasaron a Noiteboa achicando auga e recuperar a normalidade aínda lles levará uns días.
Sucede o mesmo en Narón, onde o rebordamento do río Freixeiro inundou o parque e varias casas. Hoxe tocou continuar co achique e a limpeza. Os danos son moi importantes.
Ferrolterra e o Eume foron as comarcas coruñesas máis afectadas polas trombas de auga. A chuvia cesou nas últimas horas e a situación mellorou considerablemente, tamén na rede viaria, onde se circula con normalidade.
Para as vindeiras horas agárdase chuvia, pero moito menos intensa.
