Menores da Coruña, entre as supostas vítimas de abuso sexual por internet dun home detido en Colombia

A Policía Nacional de Colombia detivo a un home polo suposto abuso sexual de tres menores da Coruña e outras vítimas en Venezuela, Costa Rica e Colombia a través de Internet tras unha investigación iniciada pola Policía Nacional española.

A investigación arrincou en agosto de 2021, cando tres pais denunciaron que as súas respectivas fillas, de 13 anos, eran vítimas dun descoñecido a través dunha rede social.

En concreto, en dous dos casos dixeron que este descoñecido obtivera fotografías de contido sexual das menores e que as extorsionaba para obter máis fotografías e vídeos similares, baixo a ameaza de que se non llos enviaban, difundiría as que tiña.

As investigacións mostraron que o contacto se establecera a través dunha rede social que pon en contacto as persoas de maneira aleatoria, relata a Policía Nacional nun comunicado, no que alerta sobre o perigo deste método, pois en ocasións relaciona con delincuentes.

"Unha vez que obtivo as primeiras imaxes de dúas da cativas, o que facía era extorsionalas e ameazalas para obter máis material ilícito", explica Santiago Reboiras, inspector do grupo tecnolóxico da Policía Xudicial da Coruña que participou na investigación.

Nun dos casos, o agora detido cumpriu a súa ameaza e remitiu unha fotografía de contido sexual a un familiar dunha das menores.

As pescudas situaron a este home na localidade de Barranquilla (Colombia) e, coa colaboración da Interpol e a Policía Nacional de Colombia, foi detido e o seu domicilio, rexistrado.

A análise dos dispositivos informáticos intervidos permitiu demostrar a súa suposta participación en feitos similares con vítimas menores de Venezuela, Costa Rica e Colombia.

O xulgado de instrución número uno da Coruña solicitou a extradición deste home a España. EFE