Miles de persoas asisten ás primeiras procesións da Semana Santa de Ferrol
Declarada de Interese Turístico Internacional, é unha das festas máis multitudinarias de España
Bo tempo para acompañar a procesión de Xesús Amigo dos Nenos e a da Entrada triunfal de Xesús en Xerusalén
O tempo acompaña neste Domingo de Ramos e as procesións puideron saír con normalidade. En Ferrol, onde a Semana Santa está declarada de Interese Turístico Internacional, dúas procesións conmemoran a entrada de Xesús en Xerusalén.
Palmas e ramos, tambores, capuchóns, bandas de música conforman a paisaxe sonora da Semana Santa de calquera cidade. Tamén a de Ferrol, recoñecida desde hai once anos como Festa de Interese Turístico Internacional. É unha das máis multitudinarias de España. "Levo moitos anos vindo a esta igrexa, bendicimos os ramos e despois imos á procesión"·
"Oliveira e loureiro (nunca falla o Domingo de Ramos), nunca, levo moitos anos".
"De Portugal, primeira vez aquí, encantador".
Cada ano, miles de persoas de Galicia e de fóra acoden a presenciar as distintas procesións que comezan o Domingo de Ramos e finalizan sete días despois co Domingo de Resurrección. "Eu procuro ir a todas as que podo, vou repartíndome". "O tempo tamén axuda, non?, pero tedes que vir o Xoves e Venres Santo, que é precioso".
Son moitos os que cumpren coa tradición, tamén a que pretende invocar a boa sorte. "Que o Domingo de Ramos se non estreas, non estreas en todo o ano".
Tras a bendición dos ramos na igrexa do Pilar... "A auga chegoume a todo, a min tamén me bendiciu"... saíu a primeira procesión, Xesús Amigo dos Nenos, pensada especialmente para os cativos. "Polo neno, que lle gustan moito os tambores, a música, todo o conxunto gústalle moito".
E ao redor do mediodía, chegou unha das procesións máis populares, que conmemora a entrada triunfal de Xesús en Xerusalén, coñecida popularmente como a Burriquiña.
