Máis de 3.000 persoas sairán nas 25 procesións programadas na Semana Santa de Ferrol

Luns Santo, toca mañá de preparativos intensos na Confraría das Dores. Volven á casa despois de sete anos, coa igrexa rehabilitada e convertida nun atractivo máis desta Semana Santa en Ferrol. O venres saíron en procesión para trasladar as imaxes á igrexa, e agora prepáranas para sacalas de novo, se o tempo o permite. 

"Non imos ser agoreiros, imos ter bo tempo e poderemos saír en procesión, estou convencido", di o presidente da Confraría, José Ángel Vázquez. Di que van planificando "día a día" para tomar a decisión de saír ou non. "Loxicamente, non imos arriscar as imaxes se dan chuvia", explica.

Son os únicos que saen en Luns Santo, cos pasos do Cristo Rei e a Virxe da Amargura. Patricia Serantes, florista, ultima a decoración dos tronos: vai picando, talo a talo, cousa de 6.000 flores en cada un. "Son moitas horas de traballo, sobre todo na planificación -explica-. Non é só a execución, pinchar a flor no paso, senón que hai que facer un deseño, para innovar e que saia diferente á do ano pasado".

Porque a Semana Santa en Ferrol prepárase case dende que remata a anterior. "Primeiro hai un traballo enorme que non se ve, e despois todo ese esforzo é o que poñemos na rúa e iso si que se ve" explica o presidente da Xunta de Confrarías, César Carreño. "Para Ferrol é un revulsivo que nunha semana haxa tantas actividades, tanta xente visitando a cidade", engade. 

As cinco confrarías poñerán na rúa 25 procesións e máis de 3.000 persoas nesta Semana Santa. É un evento de interese turístico internacional, cun importante impacto económico na zona. "Os días máis fortes, de xoves a domingo, a previsión é do 100% de ocupación", di María Saavedra, da asociación de Hostalería. 

A Semana Santa ferrolá ten máis de 4 séculos de tradición, e vaise renovando. "Este ano incorporamos tres imaxes, que implica que a Semana Santa está viva". explica César Carreño. "Temos imaxes do século XVII, XVIII, XIX, XX e agora do XXI", engade.

E di que queren facela "máis inclusiva": todos os actos da Xunta de Confrarías teñen lingua de signos, e este ano a Confraría da Mercé estrea un treito silencioso para que as persoas con diversidades cognitivas poidan desfrutar da procesión o Mércores Santo.

Será o día que arranque o groso do programa, que se estenderá -se o tempo acompaña- ata o Domingo de Resurrección.