Miles de persoas saen á rúa en defensa do mar e contra a xestión dos 'pellets'

Máis de 7.500 persoas, segundo a delegación do Goberno, marcharon este domingo polas rúas do centro de Santiago, convocadas por máis dun cento de colectivos ecoloxista e agrupacións do sector pesqueiro para "defender o futuro do mar", tras a crise dos pellets que afecta o litoral galego. 

Menos dun mes antes das eleccións autonómicas, a manifestación foi ademais un clamor contra a xestión do episodio contaminante causado pola vertedura de granulado plástico, en augas portuguesas, procedente do mercante Toconao.

Á marcha, que partiu da Alameda compostelá e concluíu na praza do Obradoiro, asistiron numerosos cargos políticos de forzas progresistas, como a vicepresidenta segunda do Goberno e líder de Sumar, Yolanda Díaz, e a exministra de Igualdade Irene Montero.

Tamén estaban presentes candidatos e candidatas que aspiran a presidir o Goberno galego a partir do 18 de febreiro, como Ana Pontón (BNG), Xosé Ramón Gómez Besteiro (PSdeG), Marta Lois (Sumar) e Isabel Faraldo (Podemos).

Reclamación das competencias

En declaracións aos medios ao inicio da manifestación, a portavoz nacional do BNG e candidata á presidencia da Xunta, Ana Pontón, amosou o seu "orgullo" de ser galega, xunto a "un país que se rebela contra a mentira" e "a desprotección".

A líder nacionalista lamentou que a Xunta "repetira" ante esta "catástrofe de marea plástica" o mesmo "modus operandi" que durante o Prestige, "a ocultación, a mentira, a manipulación" e a falta de respecto ao medio natural, asegurou.

"Hoxe aquí está un país en pé reivindicando que quere un Goberno que lle diga a verdade, reivindicando algo fundamental para Galicia, como é que temos que protexer o noso mar. E iso é algo que tamén nos imos xogar o próximo 18 de febreiro".

Avanzou que, se a cidadanía lle dá a confianza, vai reclamar todas as competencias en materia de loita contra a contaminación mariña e de Salvamento Marítimo. Tamén anunciou un plan de rexeneración e de recuperación das rías.

"Levamos 15 anos cun Goberno do PP que non soubo coidar o mar, nin a xente que vive do mar. Perdemos 700 barcos, 5.000 empregos no sector pesqueiro e marisqueiro e vemos como nos últimos anos levamos unha crise de produtividade que está a deixar atrás moitas persoas e lastrando o futuro deste país", lamentou.

"Contaminación de mentiras"

O candidato do PSdeG á presidencia da Xunta, Xosé Ramón Gómez Besteiro, fixo un chamamento para limpar o mar de pellets e da "contaminación de mentiras" das últimas semanas.

En declaracións aos medios durante a marcha, reivindicou a participación dos socialistas galegos, que acoden "á chamada da xente do mar, dos pescadores, mariscadoras, biólogos, ecoloxistas e voluntarios".

"En definitiva, de toda Galicia, para limpar este mar, limpalo de péllets, pero sobre todo, limpalo da contaminación de mentiras á que se nos someteu durante as últimas semanas", censurou.

Segundo dixo, os socialistas acudiron á manifestación de xeito "honesto, traballador e activo", para loitar por unha Galicia "limpa de pellets e limpa de plásticos e de mentiras".

Consignas

"Acórdate do mar cando vaias votar", "Non somos furtivos, somos mariñeiros", "As mariscadoras choran, as mariscadoras non facturan", contradicindo a letra da canción de Shakira, ou "A xente limpando, a Xunta manipulando", foron algunhas de consignas que se escoitaron na marcha.

Aínda que a contaminación por pellets non é comparable co desastre ecolóxico que ocasionou o afundimento do Prestige no 2002, numerosos colectivos exhibiron pancartas co lema "Nunca máis", que xurdiu para reclamar responsabilidades ambientais, xudiciais e políticas por aquel desastre.

O biólogo e investigador da Plataforma en Defensa da Ría de Arousa, Xaquín Rubido, criticou o desleixo que, ao seu entender, fixo a Xunta das súas competencias, "abandonando o noso mar e co marisqueo en serio risco de desaparición", afirmou.

Rogelio Santos, mariscador e presidente da Plataforma en Defensa da Ría de Muros-Noia, lembrou que o sector se manifestou en Santiago "para que as administracións competentes e os partidos políticos os escoiten".

"Sexa quen sexa o próximo presidente da Xunta ten que cambiar o modelo ambiental, marisqueiro e pesqueiro para que podamos ter unhas rías produtivas para a xente do mar e para toda a poboación", dixo.

Xuntanza en Celeiro

Durante a manifestación, o conselleiro do Mar mantiña un encontro con representantes do sector en Celeiro. Nesa cita, Alfonso Villares fixo un chamamento ao consumo de peixe galego.

Asegura que o mellor apoio que se lle pode dar aos profesionais do sector en Galicia é avalar o consumo do peixe e marisco do noso mar.

Lamentou a difusión de loiadas e imaxes manipuladas, así como información que causan moito dano e non se axustan á realidade.