Villares agarda un cambio de rumbo en Bruxelas: "Estes 5 anos non foron bos para Galicia"

O conselleiro do Mar, Alfonso Villares, confía que a chegada do novo eurocomisario de pesca permita "superar a etapa pasada" marcada polo seu antecesor, cinco anos, que ao seu xuízo "non foron bos para Galicia".

A xuízo de Villares, durante o mandato de Virginijus Sinkevicius "houbo unha balanza moi descompensada que prexudicou moito a Galicia". Nunha entrevista no 'Bos días' da TVG, o conselleiro repróchalle que teña tomado decisións "demasiado medioambientalistas  sen ter en conta aspectos sociais e económicos". Decisións que a día de hoxe impiden pescar á nosa frota en 87 áreas do noroeste.

Villares confía en que se poda "reverter ese camiño" co nomeamento do chipriota Costas Kadis como comisario de Pesca e Océanos da UE, co que mañá conversará por videoconferencia. "Esperamos que teña en conta as xentes que viven do mar"; "non podemos deixar a nosa xente sen recursos".

O conselleiro do Mar referiuse tamén ó posible nomeamento de Teresa Ribera como vicepresidenta da Comisión Europea. "Espero que teña máis acertos dos que tivo con Galicia", asegura Alfonso Villares.

O titular de pesca do Goberno galego critica o posicionamento da vicepresidenta do Goberno español coa lei do litoral e a xestión das empresas electrointensivas.

"Galicia é pioneira en desenvolver a Estratexia da Economía Azul", asegura Villares

O conselleiro do Mar salienta o compromiso de Goberno galego co desenvolvemento da Estratexia da Economía Azul, un mandato europeo que a nosa comunidade comezou a desenvolver "de xeito pioneiro".

Segundo explicou, trátase dun documento con 40 medidas que ten por obxectivo "preservar a nosa contorna e os nosos recursos pensando nas seguintes xeracións". 

"Trátase de coidar do noso mar pensando nas seguintes xeracións, coidalo como o mar nos leva coidando durante moitos anos", incidiu. Arredor de 200 persoas participaron no deseño desta folla de ruta coa que a Xunta pretende "deseñar a Galicia do futuro".

Na entrevista, o conselleiro do Mar salientou a necesidade de "estreitar alianzas" con Cabo Verde, un país cunha "situación estratéxica" onde traballa desde hai anos o sector pesqueiro galego.

Villares márcase como obxectivo "recuperar a actividade" da fábrica de atún de Mindelo", construída con capital galego.

Hai uns días trasladou ao ministro do Mar do arquipélago a necesidade de que "a fábrica siga funcionando" porque "durante moito tempo reportou traballo e produto para Galicia".  Neste senso, explicou, "esperamos ter noticias en poucas semanas".