Milleiros de policías nacionais e gardas civís esixen a plena equiparación con outros corpos

A manifestación transcorreu entre a praza de España e o Congreso dos Deputados. Nela unhas 12.000 persoas, segundo a Delegación do Goberno, e entre 25.000 e 40.000, segundo as organizacións convocadoras, esixiron, entre outras reivindicacións, a equiparación salarial de policías nacionais e gardas civís coas policías autonómicas e locais.

"O Goberno é contumaz á hora de non recoñecer os dereitos dos policías e dos gardas civís na mesma liña que os policías autonómicos e os policías municipais, pasa o mesmo coa equiparación, asinamos un acordo e o Goberno xudicializouno, levamos xa catro anos nesa dirección", di Adolfo Medina, presidente do Sindicato Profesional de Policía.

Na marcha, que contou co apoio de PP e de Vox, os asistentes reclamaron ademais melloras laborais, ser recoñecidos como profesión de risco e mellorar as súas condicións de xubilación.

"Ninguén entende que non se nos recoñeza profesión de risco, ninguén entende que policías autonómicas e policías locais teñan unhas condicións máis vantaxosas que policías nacionais e gardas civís. O ministro do Interior está coas súas palabras dicindo en sesión parlamentaria unha cousa que non está cumprindo con nós. Os seus feitos van na dirección contraria", engadiu Juan Fernández, voceiro da Plataforma de Policías Nacionais e Gardas Civís.

Na protesta, convocada por unha plataforma de doce sindicatos e organizacións, tamén esixiron a dimisión do ministro do Interior, ao que acusan de "falta de interese para convocar unha mesa de diálogo e de negociación".