Miñones: "Non descender ao Villa de Pitanxo é unha decisión técnica"

O delegado do Goberno en Galicia, José Miñones, insistiu este luns en que a decisión de non descender ata o lugar do afundimento do Villa de Pitanxo, como reclaman as familias das vítimas, "é unha decisión técnica".

Miñones defendeu que esta determinación "non se tomou politicamente" e asegurou que aos familiares relatáronselles os motivos "de forma moi detallada, moi específica e moi directa". "Non temos nada que achegar respecto diso polo momento", engadiu o delegado gobernamental, que afirmou que a investigación sobre as causas do sinistro, que dirixe a Comisión de Investigación de Accidentes e Incidentes Marítimos, "segue o seu curso".

José Miñones reiterou que "non hai ningún indicio" que lles faga entender que "temos que actuar ou que facer unha baixada ao barco". Apuntou que o compromiso de "buscar todas as alternativas posibles" para recuperar os corpos dos doce mariñeiros que aínda non apareceron "témolo cumprido", como así llo solicitaron as familias "desde o principio".

"Unha vez que os técnicos lles mostraran a imposibilidade de facer iso, estamos á espera de que se resolva o que creo que tamén é unha parte moi importante, que é coñecer o que pasou", subliñou Miñones.

Os familiares trasládanlle ao secretario de Estado a "necesidade imperiosa" de baixar 

Familiares dos falecidos no naufraxio do Villa de Pitanxo mantiveron este venres un encontro co secretario de Estado para a Axenda 2030, Enrique Santiago, ao que lle trasladaron a "necesidade imperiosa" de baixar ao barco afundido.

A portavoz das familias e filla do xefe de máquinas do buque, María José de Pazo, comunicou que tamén lle reprocharon "a falta de motivación" e "o carpetazo" que consideran lles trasladouo delegado do Goberno en Galicia, José Miñones.

Ademais, de Pazo sinalou que na reunión, na que participou unha representación das 21 familias, tamén lle comentaron ao secretario de Estado que seguen á espera de ser recibidos polo presidente do Goberno, Pedro Sánchez, e a ministra de Traballo, Yolanda Díaz.

Insistíronlle en que España "ten medios" para baixar ao barco, como buques Oceanográficos do Instituto Español de Oceanografía "que van a Terranova desde hai 34 anos". Sobre isto, as familias incidiron en que "priorizan a baixada ao pecio, pero nunca condicionada a recuperar corpos".