Mohamed VI congratúlase da posición "responsable" de España sobre o Sáhara

O rei Mohamed VI de Marrocos congratulouse este sábado do cambio de posición do Goberno de España respecto ao conflito do Sáhara Occidental, que cualificou de "claro" e "responsable", e afirmou que a postura sobre este conflito é "o criterio de amizade e de socios" para o país magrebí.

"Valoramos a posición clara e responsable da nosa veciña España que coñece ben a orixe e a verdade deste conflito. Esta postura positiva abriu unha nova etapa de asociación entre Marrocos e España que non será afectada pola continxencia rexional nin as evolucións políticas internas", sinalou o monarca no discurso que cada ano pronuncia con motivo da festa nacional chamada Revolución do Rei e do Pobo".

O rei Mohamed VI refírese así por primeira vez ao cambio de postura de España, que en marzo dixo que a proposta de autonomía marroquí para o Sáhara constitúe "a base máis seria, crible e realista" para a resolución desta disputa.