Morre unha anciá polo virus do Nilo, un dos dous casos confirmados en Andalucía
Morre unha anciá polo virus do Nilo, un dos dous casos confirmados en Andalucía
O outro infectado foi un home de 71 anos, que xa foi dado de alta
A Consellería de Saúde de Sevilla elevou o nivel de risco de 3 a 5, o que supón unha "actuación urxente" sobre a poboación de mosquitos do xénero Culex e unha maior comunicación sobre as medidas preventivas
![Imaxe de arquivo dun mosquito (Junta de Andalucía)](https://img-g24-crtvg.flumotion.com/prog24/2024/20240710/mosquito_virus_do_nilo_occidental_junta_de_andalucia.jpg)
Falece unha muller de 71 anos con patoloxías graves previas tras contaxiarse do virus do Nilo Occidental (VNO). A Consellería de Saúde e Consumo da Junta de Andalucía confirmou este mércores os dous primeiros casos de contaxio deste verán. O outro caso, ademais do da muller, corresponde a un home de 72 que xa foi dado de alta.
A muller foi ingresada no Hospital Universitario Virxe das Neves de Granada o pasado 5 de xullo tras presentar síntomas e faleceu o martes. O outro contaxiado por VNO é un home de 72 anos que ingresou tamén o 5 de xullo e que foi dado de alta este mércores. Ambos estiveron hospitalizados no Hospital Universitario de Valme.
Desde a Delegación Territorial da Consellería de Saúde e Consumo de Sevilla notificouse ao Concello de Dos Hermanas o seu cambio de nivel de risco de 3 a 5. Isto implica unha "actuación urxente" sobre a poboación de mosquitos adultos do xénero Culex.
Ademais a situación tamén require unha "intensificación" do Plan Municipal que esta localidade ten instaurado desde 2021. Farase un aumento da comunicación á poboación sobre as medidas preventivas, o que se tratará nunha reunión de coordinación, tal e como prevé o Programa de vixilancia e control de febre do Nilo de Andalucía instaurado desde 2021.
A infección polo VNO é unha zoonose transmitida por mosquitos do xénero Culex. A enfermidade afecta a países do sur, leste e oeste de Europa. O virus transmítese entre as aves a través da picadura de mosquitos infectados sendo este o seu ciclo natural. Os humanos e outros mamíferos poden infectarse de forma colateral, sen que se produzan novas transmisións entre eles.
Arredor do 80% das infeccións polo VNO en humanos son asintomáticas. A febre do Nilo Occidental (FNO) é a presentación clínica máis común. Os anciáns e as persoas inmunocomprometidas corren máis risco de desenvolver a enfermidade neuroinvasiva do Nilo Occidental.
Desde Saúde insistiuse na necesidade de que a poboación manteña as medidas preventivas para evitar picaduras de mosquitos nas horas de maior actividade das especies transmisoras desta enfermidade (en horas próximas ao amencer e posteriores á tardiña).
Estas medidas poden ser tanto individuais, como o uso de repelentes rexistrados de uso tópico e roupa clara e que cubra a maior parte da pel; como domésticas, uso de mosquiteiros ou repelentes ambientais, sobre todo, para a poboación vulnerable con inmunidade comprometida.