Morre unha muller acoitelada pola súa parella en Bilbao

Un home de 34 anos asasinou a súa muller cunha arma branca nun domicilio de Bilbao e foi detido, segundo informou o Departamento vasco de Seguridade.

Os feitos sucederon pasadas as 00:20 horas deste xoves nunha vivenda situada entre os barrios bilbaínos de Santutxu e Atxuri, cuxos veciños alertaron a Ertzaintza polos ruídos que se escoitaban.

Axentes da Ertzaintza e da Policía Municipal de Bilbao acudiron ao lugar e atoparon a muller de 31 anos, con "importantes lesións efectuadas cunha arma branca", cuxo falecemento foi certificado posteriormente por un médico.

No interior da vivenda, a policía localizou o presunto autor dos feitos, un home de 34 anos que convivía coa vítima, que foi controlado e detido por efectivos da Policía Municipal de Bilbao.

O Departamento de Seguridade informou de que o arrestado padece problemas psiquiátricos e foi trasladado a un centro sanitario.

O conselleiro vasco de Seguridade, Bingen Zupiria, confirmou que a muller asasinada este xoves en Bilbao recibiu varias coiteladas da súa parella, detido no mesmo domicilio, e que non había denuncias previas nin figuraba en ningunha base de datos de vítimas de violencia machista.

En declaracións aos medios na localidade biscaíña de Santurtzi, Zupiria explicou que a Ertzaintza investiga o caso como violencia de xénero e que o detido permanece en dependencias policiais á espera de ser posto ao dispor xudicial.

Prisión provisional para o home detido en Villalbilla (Madrid) pola morte da súa muller

Un xulgado de Alcalá de Henares decretou o ingreso en prisión provisional comunicada e sen fianza do marido da muller encontrada morta no seu domicilio da localidade madrileña de Villalbilla, quen foi arrestado o pasado domingo tras ser atopado o cadáver.

O titular do Xulgado de Instrución Número 6 impútalle un delito de homicidio ou de indución ao suicidio, entre outros, informou o Tribunal Superior de Xustiza de Madrid.

Con todo, a cualificación penal é inicial e podería cambiar a medida que avance a investigación xudicial e vaise derivar das dilixencias que se practiquen na instrución da causa.

Na súa declaración ante o xuíz, o acusado negou ser o autor da morte da súa muller pero o maxistrado considerou que existen suficientes indicios de delito para decretar o seu ingreso en prisión provisional comunicada e sen fianza.

O acusado denunciara que a súa muller, Raquel B. L., de 54 anos, desaparecera o 31 de agosto despois de ir visitar a súa nai á localidade toledana de Yuncos, con motivo das festas do lugar, indicaron a EFE fontes próximas á investigación. E que, tras contactar con ela esa mesma mañá por teléfono, cando ela supostamente chegara a Yuncos, non volveu ter noticias súas.

A Garda Civil abriu unha investigación e solicitou unha orde xudicial para poder rexistrar o domicilio conxugal, situado na avenida do Romero de Villalbilla.

Obtivérona o domingo e atoparon o corpo sen vida de Raquel, tras o que arrestaron o marido ao considerar que mentira na súa denuncia.

O informe preliminar da autopsia non achou signos de violencia externos no cadáver pero os investigadores están á espera da análise toxicolóxica do corpo.

Malia todo, segundo informou o delegado do Goberno en Madrid, Francisco Martín, nunha entrevista en RNE, a principal hipótese é que a morte se producise pola inxestión de medicamentos.

O corpo, que foi localizado tras obteren os axentes unha orde xudicial para rexistrar a vivenda, presenta signos de levar varios días sen vida.

Ningún dos dous estaban rexistrados no sistema VioGén e non tiñan fillos en común, dixo o delegado, quen instou a esperar o avance das pescudas para determinar a implicación concreta do arrestado.

A xuíza decretou o segredo de sumario mentres a investigación segue o seu curso, e o Ministerio de Igualdade informou de que a Delegación do Goberno contra a Violencia de Xénero está a solicitar datos para determinar se se trata dun asasinato machista.

De confirmarse a natureza machista destes dous casos, as mulleres asasinadas a mans das súas parellas ou exparellas no que vai de ano ascenderían a 36; a 1.279, desde 2003, cando comezaron os rexistros.

O 016 atende a todas as vítimas de violencia machista as 24 horas do día e en 53 idiomas diferentes, do mesmo xeito que o correo 016-online@igualdad.gob.es; tamén se presta atención mediante WhatsApp a través do número 600000016, e os menores poden dirixirse ao teléfono da Fundación ANAR 900 20 20 10.

Nunha situación de emerxencia, pódese chamar ao 112 ou aos teléfonos da Policía Nacional (091) e da Garda Civil (062), e en caso de non poder chamar pódese recorrer á aplicación ALERTCOPS, desde a que se envía un sinal de alerta á Policía con xeolocalización.