Morre unha muller de 78 anos nun atropelo en Vimianzo

Unha muller de 78 anos faleceu como consecuencia dun atropelo na estrada AC-432 á altura de Ponterroda-Vimianzo, en sentido a Ponte do Porto.

O accidente sucedeu contra as oito da tarde. A persoa, que ao parecer, non levaba chaleco reflector, cruzaba por unha zona de escasa iluminación e visibilidade.

Mobilizáronse Protección Civil e a Policía local de Vimianzo e axentes da Garda Civil de Tráfico ademais de sanitarios do 061, que non puideron facer nada por salvarlle a vida.

Tras certificar o seu falecemento trasladouse o cadáver ao complexo hospitalario da Coruña para realizarlle a autopsia.