Un pai e a súa filla morren ao bater o seu coche contra outro en Ames
Un pai e a súa filla morren ao bater o seu coche contra outro en Ames
Foi á altura de Aldea Nova, na estrada AC-543 que une Santiago e Noia
Os dous ocupantes do outro vehículo quedaron feridos de gravidade
Dúas persoas morreron nun accidente de tráfico que aconteceu na tarde deste domingo na estrada AC-543 que une Santiago e Noia, á altura da parroquia de Ortoño, no acceso a Aldea Nova.
Dous coches bateron de fronte: un Volkswagen T-Roc e un opel Corsa. Todo parece indicar que este último perdeu o control e invadiu o carril contrario. Os seus dous ocupantes faleceron: un pai e a súa filla, veciños de Laraño. El tiña 44 anos e ela, 17.
A menor saíu despedida porque, segundo as primeiras investigacións, non levaba posto o cinto de seguridade. Os ocupantes do outro vehículo implicado tiveron que ser excarcerados polos bombeiros. Están feridos de gravidade e foron trasladados ao Hospital Clínico de Santiago.
Ata o lugar desprazáronse numerosos equipos de emerxencias e tamén a alcaldesa de Santiago e o rexedor de Ames.
