Nace o Rexistro da Propiedade electrónico en Galicia con todas as xestións telemáticas
Nace o Rexistro da Propiedade electrónico en Galicia con todas as xestións telemáticas
Permitirá facer trámites como conseguir un certificado rexistral para comprar unha casa ou consultar o estado das súas solicitudes de forma telemática
O Rexistro da Propiedade e Mercantil entrou en servizo este luns en formato electrónico en Galicia a través dunha sede única despois de 163 anos en formato papel, posto en marcha en 1861.
Con todo, os rexistros físicos continuarán funcionando como ata o momento. Con este motivo, os Rexistradores de Galicia organizaron un acto conmemorativo da posta en marcha do Rexistro electrónico e a total dixitalización deste servizo, ao entender que este paso “dá visibilidade a un importante avance na seguridade xurídica e que contribúe á accesibilidade e proximidade da Xustiza”.
No acto, a decana de Rexistradores de Galicia, María Núñez, sinalou que os seus compañeiros con esta dixitalización entran na "modernidade" mediante unha decisión que ademais permitirá "facilitar a vida aos cidadáns”.
Tamén asistiu ao evento, o director xeral de Xustiza, José Tronchoni, quen sinalou que a modernización das actuacións xudiciais é un marco de acción prioritario para o Goberno galego e que se enmarca no III Plan Tecnolóxico da Administración da Xustiza. Senda 2025.
O plan conta cun investimento de 43 millóns de euros en cinco anos, o que supón un incremento do 68 % respecto do investimento dos dous plans anteriores, Senda 2014 e Senda 2020, que mobilizaron 50 millóns de euros en dez anos para avanzar na dixitalización da xustiza galega.
Acto en Madrid
A partir deste luns, o Rexistro da Propiedade, Mercantil e de Bens Mobles é completamente electrónico en toda España permitindo facer trámites, como conseguir un certificado rexistral para comprar unha casa ou consultar o estado das súas solicitudes de forma telemática, así como recibir videoasistencia.
Con este novo rexistro electrónico, que foi presentado polo Colexio de Rexistradores nun acto en Madrid, a fe pública que antes residía nos documentos físicos asegúrase dixitalmente mediante o uso de firmas electrónicas cualificadas.
Trátase da total dixitalización das actuacións rexistrais, que complementa agora a asistencia presencial, ofrece novos servizos ao cidadán como consultar a súa carpeta dixital para coñecer o estado de tramitación do seu procedemento rexistral e permite a publicidade dinámica en liña das xestións para dotalas de maior transparencia.
O director do Servizo de Estudos do Colexio de Rexistradores de España, Basilio Aguirre, puxo en valor o modelo utilizado ata o de agora, asentado na lei hipotecaria de 1861, que permitiu todos estes anos "que a inmensa maioría de cidadáns puidese acceder á propiedade da súa vivenda mediante o correspondente financiamento hipotecario".
