Nace un bebé no Reino Unido con ADN de tres persoas

Un bebé fecundado con ADN de tres persoas naceu no Reino Unido, despois de que os médicos utilizaran un innovador procedemento co obxectivo de evitar que os nenos herden enfermidades incurables, segundo publica este mércores o xornal británico The Guardian.

A técnica, coñecida como tratamento de doazón mitocondrial (MDT, polas súas siglas en inglés), utiliza tecido dos óvulos de mulleres doantes sas para crear embrións en fecundación in vitro (FIV) libres de mutacións daniñas que portan as súas nais e que é probable que llelas transmitan aos seus fillos.

Debido a que os embrións combinan o esperma e o óvulo dos pais biolóxicos con diminutas estruturas similares a baterías chamadas mitocondrias do óvulo da doante, o bebé resultante ten ADN da nai e o pai, ademais dunha pequena cantidade de material xenético (ao redor de 37 xenes) da doante.

Aínda que hai ADN dunha doante, o 99,8% do ADN do recentemente nado procede da nai e o pai, engade a información. A investigación sobre MDT, que tamén se coñece como terapia de substitución mitocondrial (MRT), foi iniciada no Reino Unido por médicos do Centro de Fertilidade de Newcastle (nordés inglés).

O proceso de Newcastle consta de varios pasos. Primeiro, o esperma do pai úsase para fecundar os óvulos da nai afectada e unha doante sa. Despois extráese o material xenético nuclear do óvulo da doante e substitúese co do óvulo fertilizado da parella. O óvulo resultante ten un conxunto completo de cromosomas de ambos os pais, pero leva as mitocondrias sas da doante en lugar das defectuosas da nai. Despois implántase no útero.