Quince mortos nun atropelo en Nova Orleáns, que se investiga como "acto de terrorismo"

Quince persoas morreron tras atropelar unha camioneta a unha multitude en Nova Orleáns, en Bourbon Street, no chamado Barrio Francés, a primeiras horas deste mércores, e máis de 30 quedaron feridas, segundo informaron as autoridades locais.

O atacante, que conducía unha furgoneta branca con matrícula de Texas, acelerou cara á rúa de Bourbon Street pouco despois das tres da mañá, e impactou contra a multitude que se atopaba nesa vía pechada ao tráfico tras a entrada do Aninovo, segundo describiu a Policía.

A superintendente do Departamento de Policía de Nova Orleáns, Anne Kirkpatrick, asegurou que o autor do atropelo "estaba empeñado en provocar un matanza e causar todo o dano posible".

A xefa policial tamén asegurou que o ataque "foi intencionado" e non é o caso dun condutor bébedo. O home impactou contra un guindastre, segundo fotos reveladas por medios locais, abandonou o vehículo e comezou a disparar, ferindo a dous axentes de policía. O autor foi abatido pouco despois, segundo a Policía.

Segundo indicou o FBI nun comunicado, a Axencia Federal está a liderar as investigacións e está a tratar este ataque como un posible "acto de terrorismo". A axente especial do FBI Alethea Duncan dixo que se atoparon "artefactos explosivos improvisados" no lugar dos feitos, aínda que se investiga se son "viables".

O sospeitoso do multitudinario atropelo está morto, segundo informou hoxe o FBI nun comunicado.  As autoridades identificárono como Shamsud Din Bahar Jabbar de 42 anos.  O home é un estadounidense, nacido en Beaumont (Texas), segundo rexistro públicos dispoñibles que coinciden coa identidade do sospeito identificado por fontes policiais vinculadas á investigación.

Ao parecer, o home traballou como informático e axente inmobiliario e serviu durante uns cinco anos no Exército de Estados Unidos, segundo os mesmos informes preliminares.

As autoridades están a investigar se Jabbar usou un rifle ou outro tipo de arma longa e disparou contra a multitude mentres atropelaba a xente, dixeron a NBC News funcionarios policiais.

Shamsud Din Jabbar levaba unha bandeira de Estado Islámico (EI) na camioneta que usou para disparar á multitude. "Conducía unha camioneta Ford, que parece ser alugada, e estamos a traballar para confirmar como o suxeito chegou a posuír o vehículo", engadiu o FBI.

O presidente estadounidense, Joe Biden, telefonou esta mañá á alcaldesa de Nova Orleáns para ofrecerlle todo o apoio federal "total" ante "a horrible noticia de que un condutor matou e feriu a decenas de persoas esta noite en Nova Orleáns".

Biden foi informado dos detalles polo FBI e o Departamento de Seguridade Nacional, mentres que o Fiscal Xeral, Merrick Garland, dixo que mobilizou a diversas axencias federais ante este ataque, incluída a axencia de control de armas e explosivos (ATF).

Biden dixo que sentiu "ira e frustración" cando se lle informou sobre o atropelo. Con todo, o presidente negouse a comentar detalles sobre a investigación. Nun comunicado afirmou que o seu "corazón está coas vítimas e as súas familias que simplemente estaban a tratar de celebrar" a entrada do ano. "Non hai xustificación para a violencia de ningún tipo e non toleraremos ningún ataque a ningunha das comunidades da nosa nación", concluíu.

O vicegobernador de Luisiana, Billy Nungesser, dixo en entrevista coa emisora local de NBC News que non se pode "evitar que un tolo" ataque cun vehículo á multitude desta maneira.

Nungesser asegurou que non pode confirmar os rumores de que a furgoneta branca do atacante tiña na parte traseira unha bandeira negra do Estado Islámico (EI), algo que se estendeu en redes sociais sen estar confirmado.

O presidente electo estadounidense, Donald Trump, atribuíu indirectamente a estranxeiros inmigrantes, sen achegar probas, o atropelo antes de expresar a súa pésame ás vítimas e ofrecer o apoio da súa Administración, que asumirá o poder o 20 de xaneiro.

"Cando digo que os criminais que vén son moito peores que os criminais que temos no noso país esa declaración é constantemente refutada polos Demócratas e os 'Medios Fake News', pero resulta ser verdade. O índice de crimes do noso país está a niveis que nunca antes se viron", indicou Trump nunha publicación na rede social Truth Social.

Esa foi a introdución previa á súa pésame pola traxedia de Aninovo de Nova Orleáns: "Os nosos pensamentos están con todas as vítimas inocentes e os seus seres queridos, incluídos os axentes valentes do Departamento de Policía de Nova Orleáns. A Administración Trump apoiará totalmente á cidade de Nova Orleáns mentres investigamos este acto de pura maldade".