Narón celebra esta fin de semana a XIX mostra da camelia
A exposición pódese visitar no centro comercial Odeón
A décimo novena edición da mostra da camelia de Narón acolle unha variedade ampla de exemplares de 24 expositores.
"Isto cada vez vai a máis. Temos máis público e cada día, camelias mellores e máis bonitas", asegura Edmundo Novoa, presidente da Asociación Galega da Camelia.
Dezaseis cultivadores presentaron, coincidindo co encontro, as súas flores a concurso. Geli Piñeiro gañou un dos premios.
"Cultivo variedades distintas e a que me premiaron é unha das máis espectaculares", explica Geli.
Outro dos premios, o do mellor conxunto floral, levouno Abelardo Barcala.
"Esta semana a camelia tivo boas condicións e púidose coller unha boa flor", apunta Abelardo.
Ademais dos que as cultivan, a camelia ten moitos amantes.
"Viñemos a ver todas estas marabillas", di unha visitante.
"As cores, as formas, todo nelas é especial", apunta outra.
"É unha flor de inverno, que hai poucas, e ademais é unha flor que leva moitos anos en Galicia e que se dá moi ben", engade un visitante máis.
"Hoxe hai pelexa en concellos por conseguir un espazo no calendario para poñer unha exposición. O calendario non dá máis de si", afirma Edmundo Novoa.
